چین کی طرف سے آذربائیجان اور آرمینیا سے اعتدال کی اپیل

چین نے آرمینی فورسز کی طرف سے آذربائیجان کی شہری آبادی پر فائرنگ کے بعد شروع ہونے والی سرحدی کشیدگی کے بارے میں متعلقہ فریقین سے اعتدال کی اپیل کی ہے۔

چین وزارت خارجہ کے ترجمان وانگ ین بن نے دارالحکومت بیجنگ میں منعقدہ معمول کی پریس کانفرنس  سے خطاب میں کہا ہے کہ علاقے میں امن و استحکام کا دوام تمام فریقین کے مفاد میں ہے۔

وانگ نے کہا ہے کہ " ہم امید کرتے ہیں مسئلے کے تمام متعلقہ فریق اعتدال و احتیاط کا دامن تھامے رکھیں گے اور تضادات و  اختلافات کے سیاسی ڈائیلاگ کے ذریعے حل کی خاطر تناو میں کمی  کے لئے ضروری تدابیر اختیار کریں گے"۔

واضح رہے کہ کل صبح کے وقت آرمینیا۔ آذربائیجان  فرنٹ لائن پر آرمینی فورسزکی طرف سے آذربائیجان کی شہری آبادی پر فائرنگ کے نتیجے میں جھڑپوں کا آغاز ہو گیا تھا۔

آذربائیجان کی فوج نے جوابی حملے کا آغاز کیا اور بعض آبادیوں کو آرمینی قبضے  سے آزاد کروا لیا تھا۔