کورونا کی وبا بڑھ رہی ہے،ممالک سیاسی اختلافات بھلا کرباہمی تعاون اپنائیں: عالمی ادارہ صحت

عالمی ادارہ صحت کے ڈائریکٹر جنرل ڈاکٹر ٹیڈروس  گیبریسیوس نے کہا ہے کہ کوئی ملک اکیلا اس وبا سے نہیں لڑسکتا، کرونا پر قابو پانے کے لیے عالمی یکجہتی کی ضرورت ہے۔

تفصیلات کے مطابق ڈائریکٹر جنرل نے ہدایت کی کہ دنیا کے تمام ممالک مشترکہ سلامتی کے لیے مل کرکام کریں، تاکہ وائرس کو محدود سے محدود تر کرکے اس پر قابو پایا جاسکے۔

انہوں نے کہا کہ ہم سب کے محفوظ ہونے تک کوئی محفوظ نہیں، ہم سب کو یہ سبق سیکھ لینا چاہیے کہ دنیا وائرس سے نمٹنے کے لیے ناکافی تیاریوں کی قیمت ادا کررہی ہے۔

ڈاکٹرٹیڈروس کا مزید کہنا تھا کہ وائرس کے خلاف تیاری ایک وقت کی نہیں مسلسل سرمایہ کاری ہے۔

یاد رہے کہ 20 جون کو ڈبلیو ایچ او کی سائنسدانوں کی ٹیم کی سربراہ سومیا سوامناتھن نے پریس کانفرنس میں بتایا تھا کہ رواں سال کورونا سے بچاؤ کی ویکیسن کی دو ارب خوراکیں دستیاب ہوں گی۔

انہوں نے یہ بھی کہا تھا کہ اس وقت دنیا کے مختلف ممالک میں بنائی جانے والی 10 سے زائد ویکسین کے انسانوں پر طبی تجربات جاری ہیں، آئندہ چند ماہ میں یہ ویکسین عام استعمال کے لیے دستیاب ہوگی۔