chawushoghlu: «türkiye– aljiriye  otturisidiki hemkarliq pütkül rayongha paydiliq»

türkiye awazi radiyosi xewiri: mewlut chawushoghlu aljiriye tashqi ishlar ministiri ramtane lamamra bilen «türkiye-aljiriye birleshme pilan guruppisi  yighini» din kéyin ötküzgen birleshme axbarat élan qilish yighinida söz qildi.

chawushoghlu aljiriye bilen soda, déhqanchiliq, béliqchiliq, sanaet, énérgiye, déngiz ishliri, herbiy mudapie sanaiti, medeniyet we maarip qatarliq sahelerdiki hemkarliq pursiti toghrisida muzakirileshkenlikini bildürdi.

chawushoghlu özara sodining bulturqigha sélishturghanda %30 ashqanliqini we bu yil 5 milyard dollardin éshishigha ishinidighanliqini tekitlep, ikki dölet otturisdiki soda miqdarini 10 milyard dollargha yetküzüsh nishanigha yétish üchün her türlük qedemlerni tashlashni dawamlashturidighanliqini uqturdi. dunyada énérgiye krizislirining yüz bériwatqanliqini, ikki dölet otturisidiki énérgiye hemkarliqining tebiiy gaz sodisi, kanchiliq we birleshme charlash paaliyetliri qatarliq oxshimighan tereplirining barliqini éytti.

chawushoghlu mensepdishi bilen qatnash, déngiz transporti we birleshme paraxot ishlepchiqirish mesilisinimu muzakirileshkenlikini eskertip, «dékabirning béshida türkiye - aljiriye otturisidiki heptilik nöwetchi ayropilanlar sanining 55 ke köpiyishi xelqlirimizning özara alaqisini téximu qoyuqlashturidu» dédi.

ministir chawushoghlu yene, mensepdishi ramtane lamamra bilen ikki dölet otturisidiki herbiy hemkarliq we mudapie sanaitide tashlinidighan qedemlerni muzakirileshkenlikini tilgha aldi.

chawushoghlu türkiyening fethullahchi térorluq teshkilatigha qarshi kürishini aljiriyening küchlük qollighanliqigha rehmet éytti.

chawushoghlu türkiye we aljiriyening pelestin meslisisidiki meydani we pozitsiyesiningmu oxshash ikenlikini we özgermeydighanliqini tekitlep, «biz türkiye bolush süpitimiz bilen aljiriyening pelestin partiyeliri otturisidiki yarishishni ishqa ashurush üchün körsetken qimmetlik tirishchanliqini küchlük qollaymiz. biz bu tirishchanliqlargha alahide rexmet éytimiz. liwiyening uzaq muddetlik tinchliqi we muqimliqi mesilisidimu aljiriye bilen oxshash pikirge igimiz. qérindishim ramtanani antalya diplomatiye munbiri yighinigha teklip qilishni xalaymen» dédi.