reisining ayropilanining qalduqini tapqan «aqinji» dunya metbuatlirida...

türkiye awazi radiyosi xewiri: iran pirézidénti ibrahim reisi qatarliq iranliq yuqiri derijilik rehberler olturghan tik uchar ayropilanning chüshüp ketkendin kéyin qalduqlirini tapqan türkiyening «aqinji» namliq uchquchisiz hujumchi hawa apparati dunya metbuatlirining bash betliridin orun aldi.

iran pirézidéntining bél-212 tipliq tik uchar ayropilan ezerbeyjandin qaytish yoli üstidiki tebriz taghliq rayonida chüshüp ketti.

weqe yüz bergen lehzilerdin bashlap izdesh-qutquzush xizmetlirini bashlighan iran, uda nechche saet boyiche tirishchanliq körsetken bolsimu, héchqandaq netijige érishelmidi.

kech bolghanda, iran türkiyedin kéchide körüsh iqtidarigha ige tik uchar telep qildi. shu haman türkiyedin qozghalghan «aqinji» namliq uchquchisiz hujumchi hawa apparati  tebriz tewelikide chüshüp ketken tik ucharni izdeshni bashlidi. 200 mingdin artuq adem biwasite közetken «aqinji» bir qanche saet ichide reisining hadisige uchrighan ayropilanining qalduqlirini tapti.

türkiye uchquchisiz hawa apparatining kishini iptixarlanduridighan muweppeqiyiti dunya küntertipining aldinqi qataridin orun aldi.

amérika qoshma ishtatlirida chiqidighan «dewr xewerliri» géziti, «bayraqtar aqinji iran pirézidéntining tik uchar ayropilanining chüshüp ketken yérini bayqighan türkiye uchquchisiz ayropilanigha aylandi» dégen témida xewer tarqatti we iranliqlar nechche saet qilalmighan ishni türkiye uchquchisiz hawa apparatining emelge ashurghanliqini qeyt qildi.

«aqinjining muweppeqiyiti üstide toxtalghan girétsiyening «péntapostagma» géziti bolsa, bu heqtiki uchurlarni «türkiye uchquchisiz hawa apparati — aqinji iran tik uchar ayropilanining qalduqini tapti. reisi we iran tashqi ishlar ministiri emir abdullahiyanning jesetliri tépildi» dégen témida  oqurmenlirining diqqitige sundi.

girétsiyening «Onalert» géziti bolsa, «iranda tik uchar hadisisi yüz berdi... türkiye uchquchisiz hawa apparati aqinji <issiqliq menbesi>ni bayqidi» dégenlerni qeyt qildi.