әрдоған б д т хәвпсизлик кеңишиниң қурулмисини тәнқид қилди

түркийә авази радийоси хәвири: җумһур рәис әрдоған истанбул қурултай мәркизидә чақирилған 35 – нөвәтлик ислам һәмкарлиқ тәшкилати иқтисадий вә сода һәмкарлиқи даимий комитети йиғини министирлар ичилиши бөлүмидә сөз қилип, «йүз бериватқан азаб – уқубәтләргә чарә тапалмиған бир б д т  инсанийәтниң сақлиниватқан мәсилилиригә чарә тапалмайду... б д т  хәвпсизлик кеңиши әзалири – даимий 5 әзасини көздә тутуватимән - ниң ичидә хәлқи мусулман бирму дөләт йоқ. иккинчи дунйа урушиниң ғалиблири тәрипидин қурулған бу адаләтсиз системиниң давамлишиши мумкин әмәс. хәлқара хәвпсизлик чиртийожлириниң заманимизниң шараитиға асасән қайтидин рәткә селиниши зөрүрийәткә айланди. б д т  хәвпсизлик кеңишиниң қурулмиси, дунйа нопусиниң җуғрапийәлик вә диний тарқилиши нәзәрдә тутулған һалда қайтидин бекитилиши керәк» деди.

әрдоған сөзи әснасида йәнә, түркийәниң, албанийәдә түнүгүн мәйданға кәлгән йәр тәврәштин кейинки җараһәтләргә мәлһәм болуш үчүн йардәм қилишқа тәййар икәнликиниң сигналини бәрди.

у ислам дунйасини албанийәгә йардәмчи болушқа чақирип, «йәр тәвригәнлики тоғрисидики хәвәрни аңлиғандин кейин түнүгүн кечә албанийә баш министири әди рамаға телефон қилип тәзийә билдүрдүм. баш министирлиқ мәһкимиси апәт вә җиддий әһвалларни бир тәрәп қилиш башқармиси вә қизилай хадимлиримиз билән керәклик әшйалар қачиланған айропилан албанийәгә йетип барди. йардәм аптомобиллириниңму бүгүн албанийәгә йетип баридиғанлиқиға ишинимән. бу йәрдин силәрниң васитәңлар билән  пүткүл ислам дунйасини албанийәгә йардәмчи болушқа чақиримән» деди.