تۈركىيە ئافغانىستاندا مەيدانغا كەلگەن تېررورلۇق ھۇجۇمىنى ئەيىبلىدى

تۈركىيە ئاۋازى رادىيوسى خەۋىرى: تۈركىيە جۇمھۇرىيىتى تاشقى ئىشلار مىنىستىرلىقى تۈنۈگۈن كابۇلدا مەيدانغا كەلگەن ھۇجۇم توغرىسىدا يازما بايانات ئېلان قىلدى؛ كابۇلدا ئۆلىمالارنىڭ يىغىن ئېچىۋاتقان ئەسنادا مەيدانغا كەلگەن بومبىلىق ھۇجۇمدا ھاياتىدىن ئايرىلغانلارىڭ ۋە يارىلانغانلارنىڭ بارلىقىدىن قايغۇرۇش ئىچىدە خەۋەر تېپىلغانلىقى ئەسكەرتىلگەن باياناتتا، «مەزكۇر تېررورلۇق ھۇجۇمىنى ئەيىبلەيمىز، ھۇجۇمدا ھاياتىدىن ئايرىلغانلارغا ئاللاھتىن رەھمەت تىلەيمىز، دوست ئافغانىستان ھۆكۈمىتىگە ۋە قېرىنداش ئافغان خەلقىگە تەزىيە بىلدۈرىمىز، يارىلانغانلارغا تېز شىپالىقلار تىلەيمىز» دېگەن ئىبارىلەرگە ئورۇن بېرىلدى.