پىروفېسسور ئەلى ئەرباش دىنىي ئىشلار باشقارمىسىغا باشلىق بولدى

تۈركىيە ئاۋازى رادىيوسى خەۋىرى: يالوۋا ئۇنىۋېرسىتېتى مۇدىرى پىروفېسسور دوكتور ئەلى ئەرباشنىڭ دىنىي ئىشلار باشقارمىسىنىڭ باشلىقلىقىغا تەيىنلەنگەنلىكى توغرىسىدىكى قارارنامە، رەسمىي گېزىتتە ئېلان قىلىندى.

پىروفېسسور دوكتور ئەلى ئەرباش، 1961 – يىلى ئوردۇ ۋىلايىتىنىڭ كابادۈز ناھىيەسىگە قاراشلىق يېشىل يۇرت يېزىسىدا دۇنياغا كەلگەن، ساكاريا ئىمام – خاتىپ تولۇق ئوتتۇرا مەكتىپىنى پۈتكۈزگەندىن كېيىن، مەرمەر ئۇنىۋېرسىتېتى ئىلاھىيەت فاكۇلتېتىغا ئوقۇشقا كىرىپ تاكى ماگىستىرلىق، دوكتورلۇق ئۇنۋانلىرىنى ئېلىپ بولغۇچە ئوقۇشىنى داۋاملاشتۇرغان. 1998 – يىلى دوتسېنتلىق، 2004 – يىلى پىروفېسسورلۇق ئۇنۋانىغا ئېرىشكەن. كېيىنچە ساكاريا ئۇنىۋېرسىتېتىدا ھەر خىل يۇقىرى دەرىجىلىك ۋەزىپىلەرنى ئۆتىگەن. 2011- يىلى تۈركىيە جۇمھۇرىيىتى دىنىي ئىشلار باشقارمىسىنىڭ مائارىپ خىزمەتلىرى مۇدىرى بولۇپ ۋەزىپە ئۆتىگەن. ئۇ، مۇشۇ يىلى (2017) ئىيۇن ئېيىدا يالوۋا ئۇنىۋېرسىتېتىنىڭ مۇدىرلىقىغا تەيىنلەنگەن.

ئىگىلىنىشىچە، پىروفېسسور دوكتور ئەلى ئەرباش ئۆيلۈك – ئوچاقلىق بولۇپ، 4 پەرزەنتى بار ئىكەن.