emine erdoghan bangladish lagéridiki arakan musulmanlirigha hediye tarqatti
dölitimiz jumhur reisi rejep tayyip erdoghanning repiqisi emine erdoghan we uning hemrahliqidiki heyet bangladishta arakan musulmanliri panahliniwatqan kutupalong lagérini ziyaret qildi.
türkiye awazi radiyosi xewiri: emine erdoghan bangladishtiki lagérlarda panahliniwatqan arakan musulmanlirini yoqlap, yüz bergen weqeler toghrisida ziyankeshlikke uchrighuchilardin ehwal igilidi. u mundaq dédi:
«insan bolush süpitimiz bilen buningdin biaram bolmasliqimiz mumkin emes, allah yardem qilsun. inshaallah pütkül dunya hem yardem qilish hemde siyasiy jehettin hel qilish üchün bu mesilige köngül böler, bu hel qilinishi kérek bolghan mesilidur. bu dewrde bundaq wehshiylikning yüz bergenlikige ishengili bolmaydu. yene kélip, bu wehshiylikler dunyaning köz aldida yüz bériwatidu. eger jinayetchi bolsa, jinayitige yarisha jaza bérish kérek. biraq, bu wehshiylikler adettiki puqralargha, xelqqe qiliniwatidu.»
emine erdoghan xelqara jemiyetke chaqiriq qilip: «hemmimizning baliliri bar, bizning balimiz emes dep körmeske salalmaymiz, buningda hemmimizning mesuliyiti bar. bu yerge shuning üchün kelduq, dunya jamaitige anglitish üchün kelduq, yardem qilish üchün kelduq, hemme kishining qolidin kélishiche tirishchanliq qilishini soraymen» dédi.
u jumhur reis rejep tayyip erdoghanning mezkur mesilini b d t (birleshken döletler teshkilati) ning küntertipige qoyidighanliqini bildürüp, barliq kishilerning mezkur mesilige köngül bölüshi kéreklikini tekitlidi.
heyet ichidin orun alghan tashqi ishlar ministiri mewlüt chawushoghlu birmadiki zorawanliqlardin qéchip bangladishqa kelgen arakan musulmanlirining yalghuz emeslikini körsitip qoyush üchün bangladishqa kelgenliklirini eskertip, mundaq dédi:
«bu yerdiki kishilerning yalghuz emeslikini, ularning yénida ikenlikimizni körsitip qoyushni ümid qilduq, paaliyitimizni pilanliq halda xelqaraliq köch idarisi bilen birlikte dawamlashturimiz. buningdin bashqa, bangladishliq dostlirimizgha bu kishilerge birlikte yardem qilayli, démekchimiz.
bu yerdin pütkül dunyagha bu yerning ehwalini körsitishni xalaymiz. biraq, ehwalni körsitip qoyush yéterlik bolmaydu, shunga bashqa tirishchanliqlirimiz dawamlishiwatidu, jumhur reisimiz körsetken tirishchanliqlarning méwisini körüshni xalaymiz. qazaqistan paytexti astanada islam dunyasidin kelgen rehberler bilen yighin ötküzimiz, andin niyu yorkta kéngeytilgen yighin chaqirimiz. biz arakan mesilisige uzun muddetlik hel qilish charisi tépishni ümid qilimiz.»
chawushoghlu birma rehberliri bilen söhbetleshkenliklirini eskertip mundaq dédi:
«jumhur reis rejep tayyip erdoghan birma pirézidénti bilen téléfonda körüshti. ulargha arakanliq musulmanlargha qaritilghan hujumlarning toxtitilishi kéreklikini éyttuq. bizge bu toghrida qolidin kélidighan barliq tirishchanliqlarni körsitimiz dep jawab berdi. biraq, ular biz körgen fotograf we sin körünüshlirini körmeske séliwatidu. shundaq bolsimu, bu mesilini birlikte hel qilishimiz lazim.»
