fidan türkiye-wénézuéla munasiwetlirining ilgirilewatqanliqini éytti

türkiye awazi radiyosi xewiri: tashqi ishlar ministiri xaqan fidan türkiye-wénézuéla hemkarliq komitétining 4-qétimliq yighinini axirlashturup, wénézuéla tashqi ishlar ministiri ywan xil (Yvan Gil) bilen birlikte muxbirlarni kütüwélish yighini ötküzdi.

u wénézuélaning nurghun dölet organliri we her qaysi ministirliqlirdin teshkillengen wekiller ömikining türkiyede ministirliqlar we idare-organlarning rehberliri bilen körüshkenlikini bildürüp, wekiller ömiki qurghan alte komitétta xizmetlirini axirlashturghanliqini eskertti.

u énérgiye, yéza igiliki, charwichiliq, sayahet, maarip, tenterbiye we sehiye qatarliq saheler boyiche ikki dölet otturisida muhim bolghan her xil témilarning sistémiliq halda muzakire qilinghanliqini eskertip: «komitétlar bir hepte muzakire qilip, toqquz kélishim tüzdi. türkiye-wénézuéla munasiwetliri her sahede ilgirilewatidu. bolupmu, türkiye bolush süpitimiz bilen latin amérika we karib déngizi döletlirige échilishimizning merkizide wénézuéla bar. yéqinqi yillarda ikki dölet otturisida élip bériliwatqan özara ziyaretler, kélishimler, özara munakireler, sodining éshishi netijiside, türkiye wénézuélani öz ichige alghan latin amérikasida tesiri küchlük döletke aylandi» dédi.

u körüshüshlerde ikki dölet munasiwetliridin bashqa, rayon we xelqaraliq mesililerdimu özara pikir almashturulghanliqini bildürüp: «wénézuéla duchar boluwatqan adaletsiz émbargolarni asas qilghan halda nurghun mesililerni muzakire qilduq. bularning ichide yene bir muhim mesile bolghan pelestin we ghezzede dawamlishiwatqan qetliamlarnimu muzakire qilduq. memnunluq bilen shuni démekchimenki, ghezze mesiliside wénézuéla bilen oxshash oylaymiz we heriket qilimiz, xelqaraliq munberlerde oxshash pozitsiye bildürimiz. ghezzediki qetliamlarning toxtitilishi, pelestin dölitining étirap qilinishi mesilisidimu dawamliq tirishchanliq körsitimiz» dédi.