تۈركىيە شاڭخەي ھەمكارلىق تەشكىلاتىدىن ۋەزىپە تاپشۇرۇۋالدى

تۈركىيە ئاۋازى رادىيوسى خەۋىرى: تۈركىيەنىڭ شاڭخەي ھەمكارلىق تەشكىلاتى ئېنېرگىيە كۇلۇبىنىڭ نۆۋەتچى رەئىسلىك ۋەزىپىسىنى ئۆتكۈزۈۋېلىشى ئاۋاز بىرلىكى بىلەن قولغا كەلدى. بۈگۈنگىچە شاڭخەي ھەمكارلىق تەشكىلاتىنىڭ ئېنېرگىيە كۇلۇبىدا پەقەت ئەزا دۆلەتلەرلا نۆۋەتچى رەئىس بولۇپ كەلگەن ئىدى. بۇ تۇنجى قېتىم شاڭخەي ھەمكارلىق تەشكىلاتىغا ئەزا بولمىغان بىر دۆلەتنىڭ، ئېنېرگىيە كۇلۇبىنىڭ نۆۋەتچى رەئىسى بولۇپ سايلىنىشى ھېسابلىنىدۇ. كۇلۇبتا تەشكىلاتقا ئەزا بولمىغان باشقا ھەمراھ دۆلەتلەرمۇ بار.

خىتاي، قازاقىستان، قىرغىزىستان، تاجىكىستان، ئىران، رۇسىيە، ئافغانىستان، ھىندىستان، موڭغۇلىيە، پاكىستان، بېلارۇسىيە ۋە سىرى لانكا قاتارلىق دۆلەتلەر ئەزا بولغان ئېنېرگىيە كۇلۇبى، 2013-يىلىدىن بۇيان پائالىيەت قىلىپ كەلمەكتە. ئېنېرگىيە كۇلۇبىغا ئەزا بولغان دۆلەتلەر دۇنيا ئېلېكتىر ئىشلەپچىقىرىش نىسبىتىنىڭ %36 نى، تەبىئىي گاز ئىشلەپچىقىرىش نىسبىتىنىڭ %23 نى، نېفىت ئىشلەپچىقىرىش نىسبىتىنىڭ %20.8 نى، كۆمۈر ئىشلەپچىقىرىش نىسبىتىنىڭ %60.25 نى ئىگىلەيدۇ.