«xelqara jemiyet térroristqa kimliki, sözi we étiqadigha qarap muamile qilmasliqi kérek»

türkiye awazi radiyosi xewiri: jumhur reis erdoghan jumhur reislik sariyida tashqi soda munasiwetler kéngishi qarmiqidiki soda – sanaetchiler we bash elchiler bilen iptar ziyapitide bir yerge jem boldi.

rusiye bash elchisi andréy karlowningmu ziyapetke ishtirak qilshi diqqet qozghidi.

erdoghan ziyapette qilghan sözide, türkiye, firansiye, bélgiye, pakistan, amérika qatarliq döletlerde yüz bergen térrorluq hujumliri sewebidin yüzlerche mesum kishining hayatidin ayrilghanliqini, dunyaning oxshimighan jayliridiki sansizlighan kishilerning étiqadi, milliti we medeniyiti seweblik aqiwéti ölüm bilen axirlishidiqan bésim, zulum – sitem we eziyelerge duch kéliwatqanliqini qeyt qildi.

qandaq bolushidin qetiynezer, héchkimning zulum sélish we zulumgha uchrishigha qetiy yol qoymasliq lazimliqini tekitligen erdoghan zulum – sitemlerge uchrighan mezlumlarni, ghériplarni birlikte baghrigha bésishning zörürlükini eskertti, dunyaning küch oyunlirigha emes, eksiche insaniyet dunyasi duch kéliwatqan mesililerge chare tépishqa éhtiyajliq ikenlikini, insaniyetning dunyani hemme üchün téximu güzel, téximu awat bir zémingha aylandurush wezipisi barliqini éytti, insaniyet dunyasining xelqara jemiyettin kütidighan ümidining nahayiti chongluqini, xelqara jemiyet bu ümidni yerde qoyghan we kirizislerni hel qilalmighan teqdirde, her bir kirizisning ete – ögün yéngi kirizislerning, yéngi mesililerning xewerchisige aylinip qalidighanliqini tekitlidi.

amérika qoshma ishtatliri pirézidénti barak obama bilen orlando weqesidin kéyin téléfon arqiliq kürüshkenlikini eskertken erdoghan bundaq weqelerge qarshi ortaq pozitsiye tutushning zörürlükini, undaq bolmighanda, térrorning her küni bashqa bir döletning ishikini qéqish éhtimalliqining barliqi toghruluq agahlandurush berdi.

erdoghan türkiyening yiraq – yéqindiki barliq qoshniliri we ittipaqdashliri bilen birlikte téximu güzel bir dunya berpa qilish üchün hemishe hemkarliq ornitishni xalaydighanliqini eskertken halda mundaq dédi: «biz diplomatiye siyasitini oyun siyasiti dep bilmeymiz, eksiche özara hörmet qilish, ortaq qimmet ölchemliri we ortaq menpeetlerge asaslinidighan tengpungluq mizani dep bilimiz. türkiyening bu dairidiki istiratégiyelik nishani dölitimizning yawropa ittipaqigha toluq eza bolushini qolgha keltürüsh. derweqe yawropada 6 milyondin köprek türk yashawatidu. bumu türkiyening yawropa ittipaqigha ezaliqini teqezza qilidu. bu ariliqta, türkiye puqralirining yawropa elliride wizisiz sayahet qilishi nishan qilinghan pilan layihesi we bu heqte ishliniwatqan xizmetlermu tamamlinish aldida turmaqta.»