23.11.2020

türkiye awazi radiyosi: «star» géziti,  «erdoghan: biz shimaliy atlantik ehdi teshkilati – natoning daéshqa qarshi mürini mürige tirep köresh qilghan birdinbir döletmiz (dédi)» serlewhilik xewiride, jumhur reis rejep tayyip erdoghanning 20 dölet guruhi bashliqlar yighinigha qatnashqan rehberlerge xitab qilip, «yalghuz tashlap qoyulghan bolushimizgha qarimay, hazirghiche 9000 gha yéqin chet ellik térroristni qolgha chüshürüp, döletlirige qayturduq. biz natoning süriyede daéshqa qarshi mürini mürige tirep jeng qilghan birdinbir döletmiz» dégenlikini oqurmenliri bilen ortaqlashti.

«weten» géziti, «dölet mudapie ministirliqining <qararname> (toghrisidiki) bayanati» serlewhilik xewiride, (türkiye jumhuriyiti) dölet mudapie ministirliqining (türkiye büyük millet mejlisi teripidin chiqirilghan) ezerbeyjan qararnamesi toghrisida bayanat élan qilip,  «türkiye armiyesi, rusiye bilen birlikte qurulidighan birleshme közitish merkizi we bu merkez orundaydighan paaliyetliride bir yil boyiche wezipe öteydu» dégenlerni otturigha qoyghanliqini yazdi.

«sabah» géziti, «gérmaniye metbuatliri: yawropa döletliri türk qoralliq uchquchisiz hawa apparatlirigha taqabil turalmaydu (dep yazdi)» serlewhilik xewiride, gérmaniyening «tagésshau» xewerler torining, türk qoralliq uchquchisiz hawa apparatlirigha yuqiri baha bérip, ezerbeyjan bilen erméniye otturisidiki ziddiyette, türkiye teminligen qoralliq uchquchisiz hawa apparatlirining ezerbeyjanning ghelbisige zor töhpe qoshqanliqini, nöwette «yawropa döletliri igidarchiliqidiki héchqandaq hawa mudapie sistémisining türk qoralliq uchquchisiz hawa apparatlirigha taqabil turalmaydighan»liqini yazghanliqini oqurmenliri bilen ortaqlashti.

«hörriyet» géziti, «sinaq qilindi... birinchi bolup bashqurulidighan bomba sistémilirida ishlitilidu» serlewhilik xewiride, sanaet we téxnologiye ishliri ministiri mustapa warankning, qele shirkiti yasap chiqqan yerlik turbojét matorini sinaq qilghandin kéyin söz qilip, «qele shirkiti yasap chiqqan yéqin kelgüside ötküzüp bérilidighan bu motorlar bilen dölitimizdiki ghayet zor boshluqni taqaymiz» dégen sözlirige orun bérildi.

xewerde, türkiyede yasalghan tunji turbojét motorining deslepki qedemde hawa armiyesi qomandanliq ishtabining eslihelirige seplinidighanliqi qeyt qilindi.

«yéngi shepeq» géziti, «amérikada yashaydighan 12 yashliq türk bala, shahmatta dunya boyiche aldinqi qatardiki 100 ademning qatarigha kirdi» serlewhilik xewiride, amérikada yashaydighan 12 yashliq türk perzenti qaghan uzning, shahmatta özining yash guruppisidikiler ichide aldinqi qatardiki 100 kishining ichige kirgenlikini yazdi.

gézitning xewiride körsitilishiche, 6 yash waqtidin bashlap shahmat oynashni ögengen we 9 yashtin bashlap izchil shahmat oynap kéliwatqan uz bu heqte toxtilip, «men shahmatqa mahir bolushni, oynashni dawamlashturushni xalaymen, méning toxtap qélish pilanim yoq» dégen.