23.05.2024
bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:
«weten géziti», «erdoghan: <israiliye 76 yildin buyan qan tökmekte> dédi» serlewhilik xewiride, jumhur reis rejep tayyip erdoghanning «israiliye 76 yildin buyan pelestinliklerning qénini tökmekte, pelestin xelqining zéminini ochuq-ashkare ishghal qilmaqta, xelqara qanunni étirap qilmaydighanliqini her daim éniq namayan qilmaqta. bu irqiy qirghinchilar choqum jawabkarliqqa tartilishi lazim» dégenlikini yazdi.
«xeber türk géziti», «türkiye pelestin dölitinining étirap qilinishidin xushal» serlewhilik xewiride, irélandiyening xitabnamisidin kéyin, norwégiye we ispaniyeningmu pelestin dölitini étirap qilidighanliqini jakarlighanliqini, norwégiye bash ministirining ikki döletlik hel qilish charisining birdinbir hel qilish charisi ikenlikini tekitligenlikini we pelestin bilen türkiyening bu qarardin memnun bolghanliqini yazdi.
«star géziti», türkiyening polshagha 24 dane bayraqtar t b 2 tipliq qoralliq uchquchisiz ayropilani tapshurushni tamamlighanliqining amérikada qiziq nuqtigha aylanghanliqini, amérika metbuatlirining bayraqtar t b 2 tipliq qoralliq uchquchisiz ayropilanning polshani shimaliy atlantik ehdi teshkilatida yükselgen uchquchisiz ayropilan merkizige aylandurghanliqini yazghanliqini xewer qildi.
«höriyet géziti», «türkiye tog arqiliq aptomobil magnitaliridin éship ketti» serlewhilik xewiride, munu uchurlargha orun ajratti:
yerlik we milliy aptomobil tog arqiliq téz tereqqiy qiliwatqan türkiye aptomobil sanaiti sahesi firansiye axbarat agéntliqi <AFP> ning diqqitini qozghidi. xewer agéntliqi türkiyening éléktronluq aptomobil baziri kölimi alliqachan aptomobil magnati italiye we ispaniye qatarliq döletliridin éship ketkenlikini we tog zawutining tunji yili tésladinmu köp ishlepchiqirishni ishqa ashurghanliqini yazdi.
«yéngi shepeq géziti, merkiziyy ishxanisi londongha jaylashqan bazar tetqiqat shirkiti <Euromonitor> ning dunya boyiche eng yaxshi sayahet sheherliri tizimlikini élan qilghanliqini, sheherlerning her xil alahidilikliri közde tutulup teyyarlanghan bu tizimlikte türkiyening istanbul, antalya we mughla qatarliq sheherlirining orun alghanliqini xewer qildi.
