24.05.2024

türkiye awazi radiyosi: «xabertürk» géziti: dölitimiz (türkiye jumhuriyiti) tashqi ishlar ministiri xaqan fidanning tünügün yawropa ittipaqining qoshnidarchiliq we kéngiyish ishlirigha mesul komissari oliwér warxéli bilen ötküzgen qoshma muxbirlarni kütüwélish yighinida, türkiyening yawropa ittipaqi ezaliq musapisi toghrisida toxtilip: «türkiye peqet yawropa ittipaqighila emes, belki yawropa ittipaqi etrapidiki barliq ittipaqlargha küch qoshidu. biz her daim yawropa ittipaqi bilen bolghan munasiwitimizni ilgiri sürüshni xalaymiz» dégenlikini yazdi.

«hürriyet» géziti: yawropa ittipaqining qoshnidarchiliq we kéngiyish ishlirigha mesul komissari oliwér warxélining tünügün paytext enqerede ministir fidan bilen qoshma muxbirlarni kütüwélish yighini ötküzgenlikini yazdi.

xewerde körsitilishiche, warxéli türkiye bilen yawropa ittipaqi otturisidiki sodining rékortni buzghanliqini tilgha élip: «ötken yili biz soda miqdari jehette rékort yarattuq؛ soda miqdarimiz 200 milyard yawrodin éship ketti» dégen.

«weten» géziti: türkiyening iran pirézidénti ibrahim reisining tik uchari chüshüp ketken jayni tépishining shiwéytsariyening metbuatlirida ghulghula qozghighanliqini yazdi.

xewerde körsitilishiche, shiwiyétsariyening «Neue Zürcher Zeitung» géziti bu heqtiki xewiride: «türkiye uchquchisiz hawa apparati ishlepchiqirish iqtidarining qanchilik yuqiri ikenlikini dunyagha yene bir qétim namayan qildi» dégen ibarilerge orun bergen.

«sabah» géziti: türkiye jumhuriyiti énérgiye we tebiiy bayliqlar ministiri alparslan bayraqtarning türkiyening qara déngizdiki burghilash paaliyiti toghrisida bayanat élan qilghanliqini xewer qildi.

gézitning xewiride körsitilishiche, ministir bayraqtar özlirining yéngi bayqashlargha qarap ilgirilewatqanliqlirini tilgha élip: «fatih burghilash paraxotimiz sakariya tebiiy gazliqidiki göktepe-2 namliq quduqta burghilash meshghulatini bashlidi» dégen.

«star» géziti: türkiye jumhuriyiti medeniyet we sayahet ishliri ministiri mehmet ersoyning türkiyening gastronomiye sayahiti toghrisida toxtilip: «türk taamliri hem tem hem chongqurluqqa ige bir xezine. nechche esirlik uchur we tejribe almashturushning mehsuli bolghan ésil taamlirimiz, tarixiy musapide köp xilliship, özgiche temliri bilen bügünge qeder saqlinip keldi. bu özgiche xezinini özige layiq shekilde tonushturush bizning aldinqi qatardiki ishimiz» dégenlikini oqurmenliri bilen ortaqlashti.