әлийев әрдоғанниң туғулған күнини тәбриклиди

+ түркийә авази радийоси хәвири: әзәрбәйҗан пирезидент мәһкимисиниң билдүрүшичә, әлийев, җумһур рәис әрдоғанниң туғулған күни мунасивити билән йоллиған тәбрик телеграммисида, түркийәниң параванлиқи үчүн ишләватқан хизмәтлиридә әрдоғанға мувәппәқийәт һәм тән саламәтликиниң йахши болушини тилигән.

әлийев тәбрик телеграммисида, түркийәниң әң муһим иҗтимаий-иқтисадий вә илмий җәһәттин зор илгириләшләрни һасил қилип, йәр шари характерлик сәвийәдә мустәқил сийасәтни йолға қойуватқан бир күч мәркизигә айланғанлиқини, бу мувәппәқийәтләрниң җумһур рәис әрдоғанниң кечә – күндүз ишләтватқан хизмәтлири һәм көрситиватқан тиришчанлиқлири сайисида қолға кәлтүрүлгәнликини әскәртиш билән бир вақитта, хәлқләрниң ирадисигә вә «бир милләт, икки дөләт» пиринсипиға асаслинидиған әзәрбәйҗан – түркийә мунасивәтлириниң нөвәттә әң йүксәк сәвийәдә болушидин өзини толиму шан - шәрәплик һес қилидиғанлиқини тәкитләп мундақ дегән: «достлуқ вә қериндашлиққа тайинидиған дөләтләр ара мунасивәтлиримизни бу сәвийәгә йәткүзүштә биваситә сизниң мислисиз ролиңиз бардур, көп йөнилишлик мунасивәтлиримиз һәм истиратегийәлик шерикликимизни йәниму йүксәк сәвийәгә йәткүзүш ирадиңизниң қәтийлики, әзәрбәйҗанниң әбәдий земинлириниң ишғалдин азад қилиниши җәрйанида қилған һәр түрлүк йардәмлириңиз, җүмлидин, очуқ – ашкара һәм қилчә иккиләнмәстин бәргән мәниви вә сийасий йардәмлириңиз, хәлқимизниң қизғин алқишиға еришмәктә. һәр саһәдики кәң көләмлик, үнүмлүк вә актип һәмкарлиқимизниң, хәлқара мунасивәтләрдә өзара ишиниш вә қоллашни асас қилидиған изчил мәйданимиз вә паалийәтлиримизниң, дөләтлиримизниң күнсери тәрәққийати вә хәлқлиримизниң параванлиқи үчүн давамлиқ хизмәт қилидиғанлиқиға ишинимән.»