әзәрбәйҗан: йалланма әскәрләр әрменийәниң дөләт сийаситиниң маһийитини ечип бәрди
әзәрбәйҗан, әреван һөкүмитиниң ишғалийәт астидики районларға чәт әл йалланма әскәрлирини елип келишиниң, терроризмниң әрменийәниң дөләт сийаситиниң бир қисми икәнликини намайан қилип бәргәнликини елан қилди.
түркийә авази радийоси хәвири: әзәрбәйҗан ташқи ишлар министирлиқи, русийә ташқи ишлар министирлиқи учур вә ахбарат ишханисиниң мунасивәтлик байанатлириға баһа берип, әрменийәниң бу хил усулларни кәң қоллинишидин әндишә қилидиғанлиқини әзәрбәйҗанниң көп қетим оттуриға қойғанлиқини хатирилитип өтти.
әзәрбәйҗан ташқи ишлар министирлиқиниң байанатида муну ибариләргә орун берилди: «әрменийә, әзәрбәйҗанниң тағлиқ қарабағ районини вә униң әтрапидики вилайәтләрни ишғал қилиш җәрйанида вә кейинки дөлитимизгә қаратқан һуҗумлирида чәт әлләрдин, болупму оттура шәрқтин терорчиларни вә йалланма әскәрләрни елип кәлгәниди.
әрменийәниң йеқинқи айларда қанунсиз олтурақлишиш сийаситиниң бир қисми сүпитидә ишғал қилинған районларға чәт әллик йалланма әскәрләрни елип келиши вә уларни «пидаий гуруппилар» намида әзәрбәйҗанға қаритилған һуҗумларға ишқа селиши, терроризмниң әрминийәниң дөләт сийаситиниң бир қисми икәнликини йәнә бир қетим көрситип бәрди.»
