әзәрбәйҗан «уруш һалити» елан қилди

түркийә авази радийоси хәвири: әзәрбәйҗан парламентиниң җиддий йиғинда мақулланған қарарға асасән, «уруш һалити» давамлашқан тәқдирдә, әзәрбәйҗан пуқралириниң вә дөләттики чәт әлликләрниң асасий қанунда бәлгиләнгән һәқ – һоқуқлири, әркинликлири вә мүлкийәт һоқуқлириға вақитлиқ қисмән чәклимә қойулидиғанлиқи билдүрүлди.

«уруш һалити» арқилиқ бир қисим районларда мәлум саәтләрдила  кочиға чиқиш чәклимисиниң елан қилиниши мөлчәрләнмәктә.

әзәрбәйҗан дөләт мудапиә министирлиқиниң билдүрүшичә, әрменийә армийәси әтигән саәт 6 әтрапида чегра линийәсини бойлап кәң көләмлик иғвагәрчилик қилип, әзәрбәйҗан армийәси нуқтилири вә пуқрави олтурақ районлирини топқа тутқан.

әрменийә армийәсиниң, тәртәрниң гапанли, ағдамниң чирақли вә оттура гарванд, фузулиниң алһанли вә шүкүрбәйли, җебрайилниң чочуқ мәрҗанли йезилирини бомбардиман қилиши нәтиҗисидә, пуқралар һайатидин айрилған вә йариланған, бу районларниң ул әслиһә қурулушлири еғир зийанға учриған.

министирлиқ тәрипидин елан қилинған йәнә бир байанатта, әзәрбәйҗан армийәси қоманданлиқ иштабиниң, хәлқниң аманлиқини қоғдаш үчүн, пүткүл чегра линийәлирини бойлап қайтурма һуҗумға өтүшни қарарлаштурғанлиқи тәкитлинип мундақ дейилгән: «қуруқлуқ армийә қисимлиримиз, танка әтрәтлиримиз, башқурулидиған бомба вә топчи қисимлиримиз, учқучисиз һава аппаратлириниң йардими астида, алдинқи сәп линийәсидә вә қоғдашқа тегишлик муһим нуқтиларда, көп сандики әрменийә әскәрлири, муәссәсәлири вә һәрбий әслиһәлирини ениқлап чиқип, йоқатти. алдинқи сәп линийәсиниң охшимиған җайлирида, әрменийәгә аит 12 данә < OSA> типлиқ зенит топ башқурулидиған бомба системиси пачақлап ташланди. әзәрбәйҗан һава армийәсигә аит бир тик уруш учар айропилани, әрменийә армийәси тәрипидин тәртәр әтрапида етип чүшүрүветилди, учқучи аман қалди.»

әзәрбәйҗан пирезиденти илһам әлийев, әрменийәниң пуқраларни нишан қилған һуҗумлири һәққидә елан қилған байанатида мундақ деди: «әрменийә башлатқан һуҗумлар нәтиҗисидә шеһит вә йаридарлиримиз бар. шеһитлиримизниң қени һәргизму йәрдә қалмайду. әрменийә армийәсигә аит һәрбий васитиләрни пачақлап ташлидуқ. әрменийә ишғал қиливалған земинлиримизға қанунсиз һалда йәрлишишкә урунмақта. биз болсақ өз земинлиримизни қоғдаватимиз. җүмлидин, қарабағ бизниң земинимиздур, қарабағ әзәрбәйҗанниң земинидур.»

йәнә бир тәрәптин, әзәрбәйҗан дөләт мудапиә министирлиқи,  фузули вә җебрайил районлирида 6 йезиниң әрменийә ишғалийитидин азад қилинғанлиқини җакарлиди.

әзәрбәйҗан дөләт мудапиә министирлиқи байанатчиси подполковник енар ейвазов, бу һәқтә өткүзгән ахбарат елан қилиш йиғинида, узун йиллардин буйан ишғал астида туруватқан фузули райониниң қараханбәйли, гәрвәнди, көй гередиз, үстүн абдурахманли йезилири, җебрайиил райониниң бүйүк мәрҗанли вә нүзгар йезилириниң әзәрбәйҗан армийәсиниң контроллуқиға  өткәнликини билдүрди.

ағдәрә вә муровдағ тәрәпләрдиму бир қисим истиратегийәлик егизликләрниң контрол астиға елинғанлиқини әскәрткән ейвазов, башқа олтурақ районлириниңму азад қилиниши үчүн һәрбий һәрикәтләрниң давамлишиватқанлиқини қәйт қилди.

әзәрбәйҗан армийәсиниң горанбой тәрәплиридә ишқа ашурған һәрбий һәрикитидин кейин, муроғдағи азад қилинди.

әзәрбәйҗан һәрбий ишлар қоманданлиқ иштаби, ағдәрә районидики әрменийә қораллиқ қисимлири гарнизон қоманданини, техиму көп адәмниң өлүм кетишиниң алдини елиш үчүн, «тиркәшмәслик вә тәслим болуш» қа чақирди.

әзәрбәйҗан дөләт мудапиә министирлиқи тәрипидин елан қилинған байанатта, әрменийә гарнизон қоманданлиқ иштаби  тәслим болған тәқдирдә, уруш әсирлири вә пуқра рәһинәләргә қарита муамилиниң, «җәнвә шәртнамиси» вә башқа хәлқаралиқ қанун – бәлгилимилиригә уйғун шәкилдә болидиғанлиқи билдүрүлди.

байанатта тәкитлинишичә, әрменийә күчлири давамлиқ тиркәшкән тәқдирдә, қораллиқ кишиләрниң һәммиси бир тәрәп қилинидикән.

игилинишичә, әзәрбәйҗан дөләт хәвпсизлик кеңишиму, пирезидент илһам әлийевниң рийасәтчиликидә җиддий йиғин чақирған.