пирофессор доктор һүсәйин йилмаз

әқлий иқтидарлиқ телефонлар арқилиқ күндилик һайатимизға киргән вә инқилаб характерлик аваз буйруқ техникисини бир түрк алимниң кәшип қилғанлиқини биләмсиз?

1926 - йили дәнизлиниң бир йезисида намрат бир аилидә дунйаға кәлгән һүсәйин йилмаз, кичик йешида ата-анисидин айрилип қалиду вә 12 йашқа киргүчә мәктәптә оқуштин мәһрум қалиду. у падичилиқ қиливатқан мәзгилидә учратқан оқутқучилар, униң мәктәпкә киришигә йардәм бериду. толуқ оттура мәктәптә оқуватқан мәзгилдә қазанған утуқлири вә әқил-параситиниң сайисида, истанбул техника университети електр енергийәси факултетиниң тәклипини тапшурувалиду вә университетни мушу йәрдә пүттүриду. у өзиниң мувәппәқийити вә тәтқиқатини қоллайдиған устазлириниң васитиси арқилиқ америка қошма иштатлиридики дунйа бойичә әң илғар университетлардин бири болған массачусетс санаәт институти (MIT)ға тәклип қилиниду. у йәрдә пирофессор унваниға еришкән һүсәйин йилмаз, алберт ейништийинниң «қурулма-функисийә нәзәрийәси» дики йетәрсизликләрни байқиғандин кейин, даңлиқ алимға мәктуп йоллайду. лекин, бу мәктуп техи тәгмәп турупла, ейништийин бу дунйа билән мәңгүлүк видалишиду. йилмаз, бу хаталиқни даңлиқ илим-пән журнилида елан қилиду вә ейништийинниң нәзәрийәсигә қарши «йилмаз тартиш күчи нәзәрийәси» ни елан қилип, өз саһәсидә тарих сәһиписидин мәңгүлүк орун алиду.

пирофессор йилмаз өзи башқурған техника ширкитидә аваз контрол қилинидиған компйутер лайиһәләш арқилиқ илим-пән тарихиға қәдәм басиду. бу иҗадийәт биз бүгүнки күндә әқлий иқтидарлиқ телефонларда ишлитидиған аваз контрол системисиниң әҗдадидур.

2013– йили бу дунйа билән мәңгүлүк видалашқан пирофессор доктор һүсәйин йилмаз, илмий һайатида нурғунлиған мувәппәқийәтлик тәтқиқатларни елип берип, физика илмиға интайин муһим төһпиләрни қошқан.