күндә үч истакан қәһвә ичиш, йүрәк кесили хәвпини төвәнлитиду

түркийә авази радийоси: венгирийәдә елип берилған әң йеңи тәтқиқатта айан болушичә, күнигә үч истакан қәһвә ичип бәргәндә йүрәк кесилигә гириптар болуш хәвпини %21 төвәнлитидикән.

венгрийә семмелвейс (Semmelweis) университети һазирғичә қилинған әң әтраплиқ қәһвә тәтқиқатини елип барди. 11 йил бойичә қәһвә истемал қилиш билән 468 миң 629 кишиниң сағламлиқ мәсилиси оттурисидики бағлиниш тәкшүрүлүп, «қәһвә йүрәк кесили хәвпини көрүнәрлик төвәнлитиду» дәп йәкүн чиқирилди.

йүрәк кесилигә гириптар болуш хәвпи %21 төвәнләйду

тәтқиқатқа асасланғанда, күнигә үч истакан қәһвә истемал қилғанда, йүрәк кесәлликлири сәвәбидин пәйда болидиған өлүм хәвпини %17, йүрәк кесилигә гириптар болуш хәвпини %21 төвәнлитидикән.

америка дөләтлик өсмә кесәлликлири иниститутиму өткән йили (2020) күнигә 7-6 истакан қәһвә ичиш арқилиқ кесәлликләр сәвәбидин өлүп кетиш еһтималлиқини %16 төвәнләткили болидиғанлиқини елан қилған иди.

қәһвәниң хамушлуқ кесилини%20, 2-типлиқ диабит кесилини%27 төвәнлитидиғанлиқи испатланған иди.

қәһвәйиңиз хуручсиз болуши керәк

мутәхәссисләрниң тәвсийәси пәқәт түрк қәһвәси вә сүзгүч қәһвә биләнла чәклиниду. истемалчилар, буниңдин башқа қәһвәләрниң тәркибидики хуручлар сәвәбидин саламәтликкә зийанлиқ болуши мумкинлики сәвәбидин агаһландурулиду.

икки йил илгири ечилған вә анадолуда 500 йиллиқ тарихқа игә қәһвә мәдәнийитини йорутуп беридиған түрк қәһвә музейиниң йунеско (UNESCO) дунйа мәдәнийәт мираслири тизимликигә киргән қарабүкниң сафранболу наһийәсидә икәнликини биләмсиз?

100 кишиниң 63 и «өзара параңлишиш» үчүн түрк қәһвәсини ичиду

түркийәдики түрк қәһвәсигә мунасивәтлик тәтқиқатларға қариғанда, түрк қәһвәси һәр 100 адәм ичидә 63 адәм үчүн «өзара параңлишиш» мәнисини билдүридикән, анадолуниң шәрқий җәнубида бу нисбәт %100 кә өрләйдикән. әгә районидикиләр қәһвәни хушаллиқ ата қилиду десә, ақдеңиз районидикиләр һарғинлиқни пәсәйтиду дәп қарайдикән.

түрк қәһвәси ичимликкә қариғанда техиму көп тәҗрибә. униң қийаминиң көплүки вә ләззәтликлики алаһидилики болуп һесаблиниду. у мис чәйнәктә пишурулуп, истакан билән ичилиду. «бир истакан түрк қәһвәсиниң 40 йиллиқ хатириси бар» дегән түрк мақал-тәмсилигә әҗәбләнмәслик керәк. түрк қәһвәсиниң келип чиқиши 15-әсирдики османли империйәсигә тутишиду.

ғазиантәпниң тизимға елинған ләззити: мәнәнгич қәһвәси

османли султани төтинчи муратниң бир қетимлиқ сәпәрдин қайтқанда ғазиантәптә ичкән мәнәнгич қәһвәси, түркийә патент вә марка идариси тәрипидин «гастрономи» саһәсидә йунескониң иҗадий шәһәрләр ториға киргүзүлгән «ғазиантәп» намида тизимға елинди.

мәнәнгич қәһвәсиниң пуриқи, тәми вә шипалиқ тәрәплири охшимиғачқа, әң йахши көрүлидиған ичимликләрниң бири қатаридин орун алиду. терилғусиз тағлиқ районларда тәбиий өсидиған мәнәнгич дәрәхләрдин елиниду.

пистә бадамға охшаш тәми бар, күздә дәрәхләрдин йиғивелинидиған мәнәнгич данчилири, алди билән қурутулиду, андин увулиду.

күчлүк пуриқи сәвәбидин, сүт билән тәййарланған мәнәнгич қәһвәсиниму түрк қәһвәсигә охшаш су билән пишурғили болиду. тәмлик болушидин башқа, һөтәл, йүрәк қан- томур кесәлликлири вә бөрәк аҗизлишиш кесәлликлиригә пайда қилиду, иммунитет системисини күчәйтиду.

қәһвәниң болупму шәһәргә келидиған сайаһәтчиләр үчүн кәм болса болмайдиған ичимликләрдин бири икәнликини тилға алған, шәһәрдики тиҗарәтчиләрдин бири болған сәлим бағчи қәһвәниң нурғун кесәлликләргә шипалиқ икәнликини билдүрүп мундақ дәйду:

«мәнәнгич йава пистә бадам һесаблиниду. пүтүнләй тәбиий болуп, тәркибидә коффеин йоқ. биз мәнәнгич қәһвәсини йерим йағлиқ сүт билән тәййарлаймиз. у майлиқ қәһвә болғачқа, қошқан сүт уни йениклитиду. мәнәнгич қәһвәсиниң 1635-йилдин тартип 400 йиллиқ тарихи бар. мәнәнгич қәһвәси җуғрапийәлик тизимлашта 37-орунда туриду. у бир хил охшимайдиған қәһвә. кишиләр уни көп истемал қилиду, чүнки униң нурғун тәбиий хусусийити бар. һазир парашок мәнәнгич қәһвәсиму ишләпчиқирилди. мәнәнгич қәһвәси иммунитет системиси, аваз йоли, һөтәлни пәсәйтиш вә қеришниң алдини елиш үчүн интайин пайдилиқ.»