«т р т ворлд пуқралар инсанпәрвәрлик кино фестивали» ниң мукапатлири тарқитилди

түркийә авази радийоси хәвири: җумһур рәислик мәһкимиси учур-алақә идарисиниң башлиқи фаһрәттин алтун, т р т баш мудири мәһмәт заһид собаҗи вә т р т мудирийитиниң әзалири «5-нөвәтлик т р т ворлд пуқралар инсанпәрвәрлик кино фестивали» да нәтиҗигә еришкәнләрниң мукапатини тарқитип бәрди.

венгирийәлик артис акос ковакс биринчилик мукапатини, иранлиқ артис алириза қазимпур иккинчилик мукапатини, косовулуқ артис самир қарахода үчинчилик мукапатини тапшурувалди.

фестивалда «килимат» вә т р т алаһидә мукапатиму тарқитилди.

т р т алаһидә мукапати ғәззәгә берилди. пәләстинлик режиссор әһмәт салиһқа берилгән болсиму, у мурасимға қатнишалмиди.

җумһур рәислик учур-алақә ишлири идарисиниң башлиқи фаһрәттин алтун: «бу фестиевал т р т ниң <өзи сөзи инсан> дегән аң билән иҗра қиливатқан тарқитиш сийаситиниң әң муһим көрсәткүчи. пүткүл дунйа иқтисадий киризислар, йуқумлуқ кесәлләр, ачарчилиқ, килимат өзгириши вә көпийиватқан тоқунушлар сәвәбидин интайин муһим һалқилиқ пәйтләрдин өткән бу күнләрдә, дәрт-әләм вә чарәсизлик билән тәлмүрүватқан милйонларчә кишигә, сәнәтниң күчи арқилиқ диққәтни мәркәзләштүргән фестивални интайин қиммәтлик һесаблаймән» деди.

у түркийәниң хәлқаралиқ мәсилиләрдә инсаний нуқтиға әһмийәт бәргәнликини, т р т ниң буниңға муһим төһпиләрни қошуватқанлиқини әскәртип, т р т рәһбәрлиригә тәшәккүр ейтти.

у исираилийәниң ғәззәгә қиливатқан һуҗумлири үстидә тохтилип, исираилийәниң һечқандақ қанунни көзгә илмайдиған инсанийәткә хилап һәрикәтлириниң, зулум вә системилиқ қәтлиамни тәң елип кәлгәнликини билдүрди.

у сөзини мундақ давамлаштурди:

«йиллардин буйан <пәләстин мәсилиси> дейилип кәлгән иди. ундақ әмәс, мәсилиниң исми <исираилийә мәсилиси> дур. пәқәт оттура шәрқла, йаки районимизла әмәс, бәлки пүткүл дунйа бу мәсилини көрүватиду.»

т р т  баш мудири мәһмәт заһид собаҗи: «пәрйатлири аңланмиған кишиләрниң һекайисини аңлитишқа мәҗбурмиз. т р т ворлд пуқралар инсанпәрвәрлик кино фестивалини, дунйаниң виҗдан авази болған түркийәдә өткүзгәнликимиздин вә диққитини инсаний мәсилиләргә мәркәзләштүргән кишиләрни дөлитимиздә күтүвалғанлиқимиздин хушалмиз. бу йилқи (2023) фестивалға, түркийә, испанийә, америка, фирансийә, һиндистан, нигерийә, қирғизистан, пакистан, венгирийә вә пәләстин қатарлиқ дөләтләрдин 370 филим илтимас сунди» деди.

у ғәззәдики тирагедийәләр вә исираилийәниң вәһшийлики үстидә тохтилип: «исираилийә 7-өктәбир (2023) дин буйан ғәззәдә омумийүзлүк һалда қәтлиам йүрүзмәктә. кичик бала, бовақ, айал, ағриқ демәстин, дохтурханиларни, муқәддәс маканларни, мәктәпләрни, мусапирлар лагерлирини бомбардиман қилип, җинайәт өткүзмәктә» деди.