мичотакс йавропа иттипақиниң түркийә қарарлиридин мәмнун икәнликини билдүрди

түркийә авази радийоси хәвири: гиретсийә баш министири керийакос мичотакис йавропа иттипақиниң һазирғичә чиқарған түркийә билән болған мунасивәтләргә алақидар қарарлиридин мәмнун икәнликини билдүрүп: «бу қарарлар йавропа-түркийә мунасивитидә илгириләш һасил қилғили болидиғанлиқидин ибарәт реаллиқни оттуриға қойиду» деди.

гиретсийә баш министири мичотакис белгийәниң пайтәхти бирйусселда өткүзүлгән йавропа иттипақи башлиқлар йиғиниға кирип китеветип бәргән байанатида, йиғинда йавропа иттипақи-түркийә мунасивити вә йавропа иттипақи комитети тәййарлиған илгириләш доклатиниңму музакирә қилинидиғанлиқини әскәртип: «мән һазирғичә чиқирилған қарарлардин рази. бу қарарлар йавропа-түркийә мунасивитидә илгириләш һасил қилғили болидиғанлиқидин ибарәт реаллиқни оттуриға қойиду»  дегәнләрни қәйт қилди.

йавропа-түркийә мунасивитиниң қибрис мәсилисидики тәрәққийатқа асасән илгирилийәләйдиғанлиқини илгири сүргән мичотакс, бирләшкән дөләтләр тәшкилати (б д т) ниң қибрис мәсилисидики йеңи вәкилиниң мәсилисини һәл қилиш тиришчанлиқиниң мевә беришидин үмид барлиқини әскәртти.