байдин: нетанйаһуниң ғәззәдә қилғанлири хата
америка пирезиденти җо байдин исираилийә баш министири нетанйаһуниң ғәззәдики һәрикәтләргә тутқан позитсийәсиниң «хата» икәнликини ейтти.
түркийә авази радийоси хәвири: пирезидент җо байдин америкада испанчә пирограмма тарқитидиған «Univision» қанилиниң зийаритини қобул қилғанда, нетанйаһу һөкүмитиниң ғәззәдики һәрикити үстидә тохталди.
у нетанйаһуни тәнқид қилип: «нетанйаһуниң қилғанлирини хата дәп ойлаймән, униң ғәззәдики һәрикәтләргә тутқан позитсийәсигә қошулмаймән» деди.
у исираилийәни ғәззәдә дәрһал уруш тохтитиш үчүн қәдәм ташлашқа вә инсанпәрвәрлик йардәмлириниң йәткүзүлүшигә рухсәт қилишқа чақирип, мундақ деди:
«ғәззәдики кишиләрниң тиббий вә йемәк-ичмәк еһтийаҗлирини қамдашқа һечқандақ баһанә көрситишкә болмайду. буни дәрһал әмәлгә ашуруш керәк.»
у исираилийә баш министири нетанйаһу билән 4-апрел телефонда көрүшкәндиму, ғәззәдә дәрһал уруш тохтитишни вә исираилийәниң бу мәсилидә қәдәм ташлишини чақириқ қилған иди.
у шу қетимқи көрүшүштә, «дунйа мәркизий ашханиси» (World Central Kitchen-WCK) намлиқ хәлқаралиқ инсанпәрвәрлик йардәм тәшкилатиниң йәттә нәпәр хадиминиң исираилийә тәрипидин өлтүрүлгәнликини әйибләп, мәзкур тәшкилатқа вә районда паалийәт қиливатқан башқа инсанпәрвәрлик йардәм тәшкилатлириға қилинған һуҗумларни, шундақла ғәззәдики инсаний вәзийәтни қобул қилғили болмайдиғанлиқини тәкитлигән иди.
