пәләстинниң йеңи баш министири: ғәззәсиз дөләт болмайду

түркийә авази радийоси хәвири: пәләстин хәвәр агентлиқи — вафаниң хәвиригә қариғанда, баш министир муһәммәд мустапа дөләт рәиси мәһмуд аббасқа <19-һөкүмәтни тәшкилләш вәзиписини қобул қилғанлиқи> тоғрисида мәктуп йоллиған.

у мәктупида, исраилийәниң 2023-йили 7-өктәбирдин буйан давамлаштуруватқан ғәззә һуҗумлири тоғрисида тохтилип: «миллий дәвайимиз баштин кәчүрүватқан бу басқучниң, ирадилик хәлқимизниң қийин шараитиниң вә нөвәттики қийинчилиқларниң еғирлиқини билимән» дегән ибариләргә орун бәргән.

мустапа мәктупида ғәззә мәсилисини  алаһидә тәкитләп: «ғәззәсиз дөләт болмайду, ғәззәдиму қуддус вә ийордан дәрйасиниң ғәрбий қирғиқидин йирақ дөләт болалмайду» дегән.

у «дөләтниң һәр қайси шәһәрлиридә, болупму пәләстинниң мәңгүлүк пайтәхти қуддуста елип бериливатқан қатиллиқ, селиниватқан вәйранчилиқ, йәһудий көчмәнләр террорлуқи билән исраилийәниң бастуруп кирип қолға елиш қилмишлири һәмдә исраилийә һөкүмити йолға қойған иқтисадий муһасирә вә пәләстин мәблиғини мусадирә қилиш сийасәтлирини әскәртип өткән.

пәләстинниң йеңи баш министири мустапа йәнә: «пәләстин хәлқи дучар болуватқан һуҗумлар техиму көп күч сәрп қилишни, сәпләрни бирләштүрүшни шундақла әрәб вә хәлқара сәһнидә давамлиқ ишләшни тәләп қилиду» дегәнләрни қәйт қилған.

у йеңи һөкүмәт тәстиқланған һаман ғәззәдики кишиләрниң азабини йәңгиллитиш үчүн тиришидиғанлиқини байан қилған.

пәләстин асасий қануниниң 65-маддисидики бәлгилимигә асасән, һөкүмәт тәшкилләш вәзиписини үстигә алған йеңи баш министир үч һәптә ичидә кабинет әзалирини бекитип, тәстиқлитиш үчүн дөләт рәисигә йоллиши шәрт. йеңи һөкүмәтни тәшкилләш үчүн әң көп болғанда қошумчә икки һәптә мөһләт берилиду.