ئىسرائىلىيە دۇنيا جامائەتچىلىكىنىڭ كۆزى ئالدىدا يېڭى قىرغىنچىلىق سادىر قىلدى

تۈركىيە ئاۋازى رادىيوسى خەۋىرى: ئىسرائىلىيە غەززەدىكى ئەلئەھلى بابتىست دوختۇرخانىسىنى بومباردىمان قىلىپ، دەسلەپكى مەلۇماتلارغا قارىغاندا 500 ئادەمنىڭ جېنىغا زامىن بولدى.

غەززەدىكى سەھىيە مىنىستىرلىقى باياناتچىسى ئەشرەف ئەلقۇدرە، ئەلئەھلى بابتىست دوختۇرخانىسىنىڭ بومباردىمان قىلىنىشى نەتىجىسىدە، كۆپ سانلىقى بوۋاقلار، بالىلار ۋە ئاياللار بولۇپ، 500 ئادەمنىڭ قازا قىلغانلىقىنى ئۇقتۇردى.

پەلەستىن دۆلەت رەئىسى مەھمۇد ئابباس بومباردىماندىن كېيىن، ئۈچ كۈنلۈك ماتەم ئېلان قىلدى.

تۈركىيە جۇمھۇرىيىتى تاشقى ئىشلار مىنىستىرلىقى فېيسبۇكتىكى ئادرېسىدا ئىسرائىلىيەنىڭ ھۇجۇمىغا نارازىلىق بىلدۈرۈپ، ئىسرائىلىيە ئۇرۇش ئايروپىلانلىرىنىڭ غەززەدىكى ئەلئەھلى بابتىست دوختۇرخانىسىنى بومباردىمان قىلىش ئارقىلىق «ئۇرۇش جىنايىتى» سادىر قىلغانلىقىنى ۋە بۇنىڭ شۇنداقلا ئىنسانىيەتكە قارشى سادىر قىلىنغان جىنايەت ئىكەنلىكىنى بىلدۈردى.

پەلەستىن ئىسلامىي قارشىلىق كۆرسىتىش ھەرىكىتى – ھاماسنىڭ ھەربىي قانىتى بولغان «قەسسام بىرىگادىسى» 7 – ئۆكتەبىر شەنبە كۈنى ئىسرائىلىيەگە قارشى «ئەقسا توپانى» ناملىق كەڭ كۆلەملىك ھۇجۇم قوزغىغانلىقىنى ئېلان قىلىپ، غەززەدىن ئىسرائىلىيەگە قارىتىپ مىڭلارچە راكېتامىيوت ئاتقان ۋە قوراللىق گۇرۇپپىلار رايوندىكى ئاھالىلەر رايونلىرىغا باستۇرۇپ كىرگەنىدى.

كۈنسېرى كەسكىنلىشىۋاتقان توقۇنۇشلار جەريانىدا، ھەر ئىككى تەرەپتىن يۈزلەرچە كىشى تالاپەتكە ئۇچرىدى.