буркина фасо фирансийә билән баҗ кәчүрүм қилиш келишимини әмәлдин қалдурди

түркийә авази радийоси хәвири: буркина фасо ташқи ишлар министирлиқи фирансийә ташқи ишлар министирлиқиға әвәтилгән мәктубида, фирансийә ширкәтлири вә пуқралири үчүн чиқирилған «қош баҗ елиништин сақлиниш келишими» ниң бикар қилинғанлиқини уқтурди.

мәктупта, келишимни бикар қилиш ишлириниң үч ай ичидә иҗра қилинидиғанлиқи әскәртилди.

«қош баҗ елиништин сақлиниш келишими» фирансийә билән буркина фасо оттурисида 1965-йили имзаланған болуп, 1967, 1971 вә 1974-йиллири келишимгә һәр хил өзгәртишләр киргүзүлгән иди.

келишим рамкисида, фирансийә ширкәтлири вә пуқралири буркина фасода қолға кәлтүргән кириминиң беҗини буркина фасоға төләйду. буниңдин башқа, буркина фасода нурғун баҗлар кәчүрүм қилиниду.

мәзкур келишим, болупму буркина фасода сода билән шуғуллиниватқан фирансийәниң хәлқаралиқ ширкәтлири үчүн пайдилиқ иди. келишимниң бикар қилиниши билән, фирансийәликләр буркина фасода қолға кәлтүргән кириминиң беҗини бу дөләткә төләшкә мәҗбур болиду.

буркина фасо 2020- вә 2021-йиллири келишимни қайтидин музакирә қилишни тәләп қилған, әмма фирансийә буниңға җаваб бәрмигән иди.

буркина фасониң узун йиллардин буйан келишим сәвәбидин нурғун миқдарда кирим қилиштин мәһрум қалғанлиқи, келишимниң әмәлдин қалдурулуши билән муһим баҗ киримигә еришидиғанлиқи қәйт қилинмақта.

фирансийә бир қанчә күн илгири нигердики һәрбий өзгиришни қоллиған буркина фасоға беридиған тәрәққийат вә малийә йардәмлирини тоңлатқан иди.