пәләстин: әзәрбәйҗанниң дипломатик вакаләтхана ечиш қараридин хурсәнмиз

түркийә авази радийоси хәвири: пәләстин ташқи ишлар министирлиқиниң йазма байанатиға асасланғанда, ташқи ишлар министири рийад әлмалики әзәрбәйҗан ташқи ишлар министири җәйхун байрамов билән рамаллаһтики ташқи ишлар министирлиқи бинасида бир йәргә җәм болған.

икки министирниң учришишида, пәләстиндики өзгиришләр һәққидә музакирә елип берилған.

әзәрбәйҗан ташқи ишлар министири җәйхун байрамов әзәрбәйҗанниң икки дөләтлик түзүмгә асаслинидиған һәл қилиш чариси вә шәрқий қуддус пайтәхти болған пәләстин дөлити қуруш пиланини қоллайдиғанлиқини билдүргән, һәмдә әзәрбәйҗанниң бир йил ичидә пәләстиндә дипломатик вакаләтхана ачидиғанлиқини тәкитлигән.

пәләстин ташқи ишлар министири рийад әлмалики болса, «исраилийә ирқий айримичилиқ түзүми вә ирқчилиқни асас қилидиған мустәмликилик, пәләстин земинлирида йәһудий көчмәнләрни йәрләштүрүштәк ишғал қилиш лайиһәсини давамлаштурмақта» дегән.

әлмалики әзәрбәйҗан ташқи ишлар министири җәйхун байрамовниң дипломатик вакаләтхана ечилиши үчүн пәләстингә қилидиған зийаритини күтүватқанлиқини тәкитләп мундақ дегән: «бу қарар әзәрбәйҗан җумһурийити билән мәдәнийәт, сайаһәт, маарип, пән- тәтқиқат вә тәрәққийат қатарлиқ нурғун саһәләрдики һәмкарлиқни күчәйтип, икки дөләт мунасивәтлирини ортақ мәнпәәтләр асасида техиму қудрәт тапқузушқа төһпә қошиду.»

у йәнә, икки дөләт мунасивәтлириниң йахши икәнликини, шуңа дипломатик вакаләтхананиң әлчихана сәвийәсигә йәткүзүлүшини үмид қилидиғанлиқиниму сөзлиригә илавә қилған.