нато баш катипи: хитай русийә – украина урушиниң нәтиҗилирини йеқиндин көзәтмәктә

түркийә авази радийоси хәвири: нато баш катипи столтенберг шәрқий асийа зийарити даирисидә йапонийә пайтәхти токйоға йетип барди.

у токйодики  учришишлирини тамамлиғандин кейин, кейо университетида сөзлигән нутуқида мундақ деди: «йапонийә йәршаридики муһим актийор болуп, тинчлиқни актип қоллимақта. дәрвәқә, шималий атлантик әһди тәшкилатиниң вәзиписиму тинчлиқни қоғдаштур.»

у терроризмдин килимат өзгиришигичә, тор тәһдитлиридин йадро қораллириниң кеңийишигичә болған йәршари характерлик хирисларниң күнсери күчийип кетиватқанлиқини әскәртип мундақ деди: «хәлқаралиқ тәртип тәһдиткә учримақта. мана мушундақ әһвал астида, москва билән бейҗиң мустәбит өктичиләрниң алдинқи сепидә турмақта.»

у шималий корейәниң башқурулидиған бомба синақлириниңму хәлқаралиқ бихәтәрликкә тәһдит селиватқанлиқини әскәртти, һәмдә хитайниң һинди-тинч окйандики тәсир күчиниң барғансери зорийиватқанлиқидин әндишә қилиниватқанлиқини қәйт қилди.

у русийә украинаға қарши урушта ғәлибә қилған тәқдирдә, «москва вә бейҗиңға берилидиған сигналниң, <рәһимсизләрчә күч ишләткәндә нишанға йәткили болидиғанлиқи> дин ибарәт болидиғанлиқини тәкитләп мундақ деди: «бүгүнки күндә йавропада йүз бериватқан ишлар әтә - өгүн шәрқий асийадиму йүз бериши мумкин.»

у йәнә, урушниң пәқәт йавропа киризиси болупла қалмастин, йәнә дунйави бихәтәрлик вә муқимлиққа қарита дуел елан қилиш һесаблинидиғанлиқини әскәртип мундақ деди: «хитай русийәниң украинаға қаратқан урушиниң нәтиҗилирини йеқиндин көзәтмәктә вә кәлгүсидики қарарлириға тәсир көрситидиған тәҗрибә – савақларни йәкүнлимәктә.»