йавропа парламенти украинани 18 милйард йавролуқ киредит билән тәминләш лайиһәсини мақуллиди

түркийә авази радийоси хәвири: фирансийәниң страсбург шәһиридики йавропа парламенти омумий кеңишида авазға қойулған қанун лайиһәси, 38 гә қарши 508 аваз билән қобул қилинди.

мәлуматларға қариғанда, йавропа иттипақи тәрипидин һәр айда 1 милйард 500 милйон йавроға бөлүп берилиш пиланлиниватқан бу қанун лайиһәси, 2023-йили украина еһтийаҗлиқ болған айлиқ 3-4 милйард йавролуқ киредитниң йеримини дегүдәк қамдашни мәқсәт қилидикән.

бу иқтисадий йардәм арқилиқ болупму украинадики дохтурхана вә мәктәп қатарлиқ аммиви мулазимәт орунлирини қоғдаш, сәргәрданларни панаһландуруш, макро иқтисадниң муқимлиқини сақлаш вә вәйран болған пуқралар ул әслиһәлирини қайта қуруш нишан қилинидикән.

украинаға йавропа иттипақи киредитиниң берилишкә башлиниши үчүн, қанун лайиһәсиниң чоқум 6-декабир әза дөләтләр қурған йавропа иттипақи кеңиши тәрипидин бирдәк аваз билән тәстиқлиниши керәк икән. бу киредитниң 2023-йилиниң башлиридин етибарән берилиши күтүлмәктә икән.

йавропа парламентиниң мәлуматлириға қариғанда, йавропа иттипақи вә әза дөләтләр 24-феврал уруш башланғандин буйан украинаға 19 милйард 700 милйон йавро йардәм қилған.