америка русийәни ашлиқ мәсилисидә агаһландурди

түркийә авази радийоси хәвири: америка йеза игилики министири том вилсак б д т баш мәркизидә өткүзүлгән ахбарат елан қилиш йғинида, вухән вируси (Kovid-19)йуқуми вә тәминләш зәнҗиридә йүз бәргән мәсилиләр, килимат өзгириши вә русийәниң 24-феврал (2022) украинаға қарши башлиған таҗавузчилиқ урушиниң дунйа йемәк-ичмәк бихәтәрликигә нисбәтән зор әндишәләрни күчәйткәнликини алаһидә тәкитлиди.

у американиң ашлиқ ишләпчиқиришни көпәйтидиғанлиқини, оғут ишлитиш вә ишләпчиқиришиға 500 милйон доллар мәбләғ селишни пиланлиғанлиқини әскәртип, дөләтләрниң ашлиқ амбарлириға мунасивәтлик ениқ санлиқ мәлуматлириниң болмаслиқиниңму йемәк-ичмәк баһалириниң өсүшигә сәвәб болғанлиқини билдүрди.

у американиң йемәк-ичмәк вә оғутқа ембарго иҗра қилинмиғанлиқини билдүрүп, русийәгә украина ашлиқидин «қорал» сүпитидә пайдиланмаслиқни, портларни ечиветишни вә урушни ахирлаштурушни чақириқ қилди.

у украинадики уруш сәвәбидин 20 милйон тонна ашлиқниң портларда бесилип қалғанлиқини, бу сәвәбтин оттура шәрқтә вә шималий африқада йүз бериш еһтимали болған ачарчилиқниң район муқимлиқиға тәсир көрситидиғанлиқи тоғрисида агаһландурди.

у ахирида, б д т ниң украина ашлиқини қара деңиз арқилиқ експорт қилиш мәсилисидә муһим музакирәләрни өткүзүватқанлиқини, түркийәниңму муһим учришишларни өткүзүватқанлиқини билдүрүп, русийәдин буниңға әстайидил муамилә қилишни күтидиғанлиқлирини қәйт қилди.