нигерийәниң бәзи районлирида һейтни тәбрикләш паалийәтлири әмәлдин қалдурулди

түркийә авази радийоси хәвири: ғәрбий африқаға җайлашқан нигерийәниң шималида йеқинқи вақитларда күчийиватқан хәвпсизлик мәсилилири сәвәбидин бәзи районларда қурбан һейт (19-21-ийул күнлири) ни тәбрикләш паалийәтлирини өткүзмәслик қарар қилинди.

катсина әмирликиниң байанатчиси иро биндава (İro Bindawa) йазма байанатида, дөләттики хәвпсизлик мәсилилири сәвәбидин катсина иштатиниң давра әмирликини өз ичигә алған бәзи районларда, бу йилқи (2021) қурбан һейтни тәбрикләш паалийәтлириниң өткүзүлмәйдиғанлиқини билдүрди.

у райондики хәлқни һейтни пурсәт дәп билип, дөләттә тинчлиқниң орнитилиши үчүн дуа қилишқа чақирип: «һөкүмәт хәлқниң бихәтәрликигә әһмийәт бериду. бу сәвәбтин, һейт җәрйанида һәммә кишиниң өйидә олтурушини тәләп қилиду» деди.

нигерийәдә барғансери күчийиватқан хәвпсизлик мәсилилири сәвәбидин катсина иштатида 6-ийулда йүз бәргән қораллиқ кишиләрниң һуҗумида, 21 киши җенидин айрилған иди.

тәхминән 200 милйон нопусқа игә африқа қитәсидә нопуси әң зич болған нигерийә, ғәрбий африқадики мусулманлар көп болған дөләт һесаблиниду. нопусиниң йеримидин көпини мусулманлар тәшкил қилидиған бу дөләттә, һәр йили өткүзүлидиған һейт тәбрикләштә ат минишқа охшаш паалийәтләр өткүзүләтти.