malayshiya xitayning 16 urush ayropilanining hawa tewelikige qanunsiz kirishige naraziliq bildürdi

türkiye awazi radiyosi xewiri: malayshiya tashqi ishlar ministiri hishamuddin hüseyin yazma bayanat élan qilip, malayshiya hawa armiyesining tünügün élan qilghan mezkur weqege alaqidar bayanatigha asasen, malayshiya hökümitining, xitay hökümitining malayshiya hawa tewelikige dexli qilish qilmishigha naraziliq bildürüp, diplomatik ultimatom yollaydighanliqini éytti.

hishamuddin: «16 urush ayropilanining malayshiyaning hawa boshluqi we bashqurush tewelikige dexli qilishigha izahat bérishi üchün xitayning malayshiyada turushluq bash elchisi ministirliqqa chaqirilidu» dédi.

u, malayshiyaning hawa boshluqi hoquqigha dexli qilish mesilisidiki endishisini xitay tashqi ishlar ministiri wang yighimu yetküzidighanliqini bayan qilip: «malayshiyaning her qaysi döletler bilen dostane munasiwet ornitish arzusi, özining dölet bixeterlikige alaqidar mesililerde yol qoyidighanliqidin dérek bermeydu. malayshiya özining igilik hoquqi we sheripini qoghdash iradisini dawamlashturidu» dégenlerni qeyt qildi.

xitayning malayshiyada turushluq elchixanisining yazma bayanatida bolsa, tünügünki uchushning malayshiyaning hawa boshluqi igilik hoquqigha ziyan yetküzmigenliki, uning daimliq meshiq ayropilani uchushi ikenliki otturigha qoyuldi.

tünügün malayshiya hawa armiyesi yazma bayanat élan qilip, 5- ayning 31- küni xitay hawa armiyesining 16 ayropilanining malayshiya hawa boshluqi tewelikige qanunsiz halda kirgenlikini uqturghanidi.