америка ирақтики әскәрләрниң чекинишигә мунасивәтлик келишим йоқлуқини билдүрди

түркийә авази радийоси хәвири: америка ташқи ишлар министири антони блинкен билән ирақ ташқи ишлар министири фуад һүсәйинниң башчилиқида икки дөләт һәйәтлириниң 3-қетимлиқ дийалог учришишлиридин кейин елан қилинған ортақ байанат талаш-тартиш қозғиди.

америка дөләт мудапиә министирлиқиниң байанатчиси җон кирби күндилик ахбарат елан қилиш йиғинида ейтқан «ирақтики америка әскәрлириниң чекиниш мусаписиниң давамлишиши тоғрисида пикир бирлики һасил қилинди» дегән сөзиниң, әмәлийәттә чекинишниң башлинидиғанлиқи мәнисини билдүрмәйдиғанлиқини илгири сүрди.

у: «байанат, икки тәрәпниң ахирқи чекиниш үстидә бәзи қошумчә техникилиқ учришишларниң өткүзүлүшини қарар қилғанлиқини көрситиду» деди.

у һәр икки тәрәпниң американиң ирақтики мәвҗутлуқиниң әһмийити үстидә пикир бирдәкликигә игә икәнликини илгири сүрди.

у йәнә, американиң чекиниш нийитиниң йеңи әмәсликини, әмма байанаттики йеңи нуқтиниң чекиш тоғрисидики «техникилиқ учришишларниң өткүзүлүши» икәнликини алаһидә әскәртип: «һазир бәзи әскәрләрниң қачан чекинидиғанлиқиға мунасивәтлик һечқандақ келишим йоқ» деди.

сабиқ пирезидент доналд трамп һөкүмити ирақтики америка әскәрлириниң санини 2 миң 500 гә қисқартидиғанлиқини елан қилған иди. әмма, 20-йанвар (2021) һоқуқни тапшурувалған җо байдин һөкүмити барлиқ әскәр әвәтиш вә чекиниш ишлирини вақитлиқ тохтатқан иди.