америкалиқ бир әмәлдар фаһризадә суйиқәстиниң арқисида исраилийәниң барлиқини илгири сүрди

түркийә авази радийоси хәвири: америкалиқ бир әмәлдар исминиң ашкариланмаслиқини шәрт қилған һалда CNN  телевизийәсиниң зийаритини қобул қилип, исраилийәниң иранлиқ алим муһсин фаһризадәгә суйиқәст қилғанлиқини билдүрди.

исраилийәниң барлиқ һәрикәтлирини америкаға алдин доклат қилидиғанлиқиға ишарәт қилған мәзкур әмәлдар, мәзкур һуҗум тоғрисида америкаға алдин мәлумат берип – бәрмигәнликини ашкарилимиди.

у, иран суйиқәст мәслисидә исраилийәни әйиблигәнлики үчүн, райондики америка пуқралириға һечқандақ хәвп йәтмәйдиғанлиқи қаришини оттуриға қойди.

мәзкур әмәлдар, иранниң һазирғичә қуддус қисимлири қомандани қасим сулайманиниң интиқамини алмиғанлиқини қәйт қилип, сулаймани вапат болғанлиқиниң бир йиллиқини хатириләш мунасивити билән иранниң бир йәргә һуҗум қилишидин әндишә қилидиғанлиқини сөзлиригә илавә қилди.

у йәнә, американиң сулаймани өлтүрүлгән 3 – йанвар күнидә бирәр йәргә һуҗум қилинидиғанлиқини күтүватқанлиқини, бирақ сайламда ғәлибә қилған җо байдинниң қәсәм берип вәзипә өткүзүвелиш мурасимиға пәқәт икки һәптила вақит қалидиған болғачқа, теһранниң таллаш йоллириниң чәклик болидиғанлиқини илгири сүрди.

у ахирида, иранниң америка әскәрлири йаки пуқралириға һуҗум қилишиниң, җо байдинниң иран йадро келишимигә қайтидиғанлиқи тоғрисидики вәдисини қийин әһвалға чүшүрүп қойидиғанлиқи тәкитләп өтти.