америка әдлийә министири: сайламниң нәтиҗисини өзгәртидиған дәриҗидә қанунсизлиқ байқалмиди

түркийә авази радийоси хәвири: америка әдлийә министири вилйам бар американиң «AP» хәвәр агентлиқиға бәргән байанатида, «һазирға қәдәр сайламда башқичә нәтиҗини оттуриға чиқиридиған сәвийәдә қаидисизликни көрмидуқ» деди.

министир вилйам бар мунасивәтлик федератип органлар вә федератсийә тәкшүрүш идариси (FBI) ниң тапшуруп алған барлиқ учурларни тәкшүргәнликини, бирақ һазирғичә маһийәтлик алдамчилиқ тоғрисида һечқандақ пакит тапалмиғанлиқини әскәртти.

министир вилйам бар йәнә, беләт санаш машинисиға мунасивәтлик «һелә» һәққидики әйибләшләрниңму тәкшүрүлгәнликини вә һазирғичә бу әйибләшләрни испатлайдиған һечқандақ пакит тапалмиғанлиқини байан қилди.

сайламда алдамчилиқ қилинғанлиқини илгири сүрүп, һазирғичә  сайлам нәтиҗисини қобул қилмай келиватқан америка президенти доналд трампниң әксичә байанат бәргән  вилйам барниң сөзлири америка таратқулирида зор ғулғула пәйда қилди.

нурғун ахбарат васитилири вилйам барниң байанатиниң тирампниң сөзлирини инавәтсиз қилидиған дәриҗидә муһим һалқиш болғанлиқини илгири сүрмәктә.

доналд трамп йәкшәнбә күни елан қилған байанатида, әдлийә министирлиқи вә федератсийә тәкшүрүш идарисиниң сайлам алдамчилиқи тоғрисидики әйибләшләрни йеқиндин тәкшүрүши керәкликини ейтқан иди.

америкада 270 вәкилгә йәткән намзат президентлиқ вәзиписигә олтуралайдиған болуп, 3 -  нойабирдики америка пирезидентлиқ сайлимида, җо байден 306 вәкилгә еришкән вә һазирқи пирезидент доналд трамп 232 вәкилдә еришкән, бирақ трамп сайлам нәтиҗисини қобул қилмайдиғанлиқини елан қилған иди.