гутеррес «тәбиәт ғәзәблинип биздин интиқамини алиду» дәп агаһландурди
бирләшкән дөләтләр тәшкилати (б д т) баш катипи антонио гутеррес б д т килимат йиғинида түнүгүн рәһбәрлиригә хитаб қилип, тәбиәтниң ғәзәпләнгән һалда интиқам алидиғанлиқини ейтти.
түркийә авази радийоси хәвири: америкиниң нйу йорк шәһиридә чақирилған йиғинда йеқинқи 5 йилниң «әң иссиқ йиллар» сүпитидә тарих сәһипилиридин орун алғанлиқини тилға алған гутеррес, «иссип кетидиған дунйамиз <әмди йәтсун> дәп налә қилмақта. дәрһал турмуш шәклимизни өзгәртмисәк, һайатимизни хәвпкә иттиримиз» дәп агаһландурди.
деңиз вә окйанлардики суниң өрләп кәткәнликигә, музларниң ериватқанлиқиға, қурғақчилиқниң кеңийиватқанлиқиға вә далиларда от апәтлириниң йүз бериватқанлиқиға ишарәт қилған гутеррес, чөлләрниң кеңийип суға еришишниң барғанчә қийинлишиватқанлиқини ейтти вә сөзини давамлаштуруп, «тәбиәт ғәзәпләнмәктә, уни алдийалаймиз дәп ойлисаңлар хаталашқан болисиләр. чүнки тәбиәт һәрдаим интиқамини алиду» дегәнләрни қәйт қилди.
у, тәбиәт билән сөһбәт өткүзгили болмайдиғанлиқини тәкитләп, «мениң нәслим каинатни муһапизәт қилиш мәсулийитини ада қилалмиди, бу (иш) өзгириши керәк. килимат киризисиға қарши күрәштә йеңилип қеливатимиз, бирақ ғәлибә қилишимизму мумкин. бу киризисни биз пәйда қилдуқ, чарисиниму биз тепишимиз керәк» деди.
