америка әскәрлирини сүрийәдин чекиндүрүп чиқишқа даир қарарнамә имзаланди

түркийә авази радийоси хәвири: америка мудапиә министири җеймис маттис, америка әскәрлирини сүрийәдин чекиндүрүп чиқишқа мунасивәтлик қарарнамини имзалиди.

америкадики « CNN » телевизийә қанили мудапиә министирлиқидики икки мәсулниң мәлуматиға тайинип туруп бәргән хәвиридә, келәр йили йанварда вәзиписидин истепа беридиған америка мудапиә министири маттис тәрипидин имзаланған қарарнамидә америка әскәрлириниң сүрийәдин қандақ вә қачан чекинип чиқидиғанлиқи тоғрисида мәлумат барлиқи, чекиниш хизмәтлириниң пат йеқинда башлинип бир нәччә һәптә давамлишидиғанлиқи әскәртилди.

америка пирезиденти доналд трампниң сүрийәдики америка әскәрлирини чекиндүрүп чиқишни қарар қилишидин кейин, мудапиә министири маттис вәзиписидин ситепа беридиғанлиқини уқтурғаниди.

американиң кентуки иштати алий палата әзаси ранд павул, « CNN » телевизийә қанилиниң зийаритини қобул қилип американиң сүрийәдики әскәрлирини чекиндүрүп чиқиш қарари үстидә тохталди.

американиң башқа дөләтләрниң һакимийәт түзүлмисини өзгәртиш нийитиниң йоқлиқини әскәрткән павул, доналд трампниң американиң ираққа киришиниң «әң чоң ташқи сийасәт паҗиәси»дәп тәриплишиниң толиму мувапиқ болғанлиқини ейтти.

пирезидент доналд трампниң сүрийәдики америка әскәрлирини чекиндүрүп чиқиш қарарини бәзи америкалиқ генералларниң тәнқид қилғанлиқини билдүргән павул мундақ деди: «мән пирезиденттин пәхирлинимән, у бурун мушундақ қилиш тоғрисида вәдә бәргәниди, мениңчә нурғун адәм бу мәсилидә пирезидентимизға охшаш ойлайду, узундин буйан нурғун җайда уруш қиливатимиз, тирилйон доллар чиқим қилдуқ, биз бу сәвәбтин сүрийәдин чекиндуқ.»

доналд трамп твиттер адресида павулниң бу сөзлирини ортақлишип униңға рәһмәт ейтти.