Twitter русийәгә чәклимә қойди
америкиниң аммиви ортақлишиш тор бети Twitter русийә таратқулиридин Russia Today билән Sputnik қа америкида 8 – нойабир өткүзүлгән пирезидент сайлимиға мудахилә қилғанлиқини илгири сүрүп чәклимә қойди.
түркийә авази радийоси хәвири: Twitter тәрипидин бу һәқтә елан қилинған байанатта, мәзкур орунларниң Twitter арқилиқ һечқандақ бир шәкилдә елан берәлмәйдиғанлиқи тәкитлинип мундақ дейилди: «америка ахбарат гурупписиниң тәтқиқатға асасланғанда, Russia Today билән Sputnik русийә һөкүмити намидин 2016 – йилқи америка пирезидент сайлимиға мудахилә қилишқа урунған. ширкитимиз бундақ қилмишниң Twitter дә оттуриға чиқишини қәтий халимайду. шуңа Russia Today билән Sputnik ниң Twitter арқилиқ елан бериши чәклиниду. Russia Today ниң 2011 – йилдин буйан Twitter дә елан бериши нәтиҗисидә қолға киргүзүлгән 1.9 милйон долларлиқ кирим америка пирезидент сайлими үстидин елип бериливатқан тәкшүрүш ишлириға ианә қилиниду.»
Twitter 28 – сентәбир елан қилған байанатида, Russia Today ниң бултур америкида елан үчүн 274100 доллар хәҗлигәнликини һәмдә Russia Today гә аит үч Twitter сәһиписидә 1823 һәмбәһирлишишни ишқа ашурғанлиқини уқтурғаниди.
русийә буниңға дәрһал инкас қайтуруп, Twitter ниң Russia Today билән Sputnik қа чәклимә қойушиниң русийә таратқулириға тосалғу пәйда қилиш икәнликини, буниңға чоқум җаваб қайтурулидиғанлиқини җакарлиди.
русийә ташқи ишлар министирлиқи байанатчиси марийа заһарова Twitter ниң бу һәқтә чиқарған қарариниң зораванлиқ икәнликини, буниң америка даирилири вә ахбарат органлириниң бесиминиң нәтиҗиси икәнликини тәкитләп мундақ деди: «ахбарат органлириниң йардими сайисида русийәниң ахбарат васитилириниң паалийәтлиригә чәклимә қойушини, америкиниң өзиниң пикир әркинликиниң капалити һесаблинидиған хәлқаралиқ һәм дөләтлик қанун – бәлгилимилирини еғир дәриҗидә дәпсәндә қилиши дәп қараймиз. бу һәрикәт америкиниң хусусий ширкәтләрниңму иштирак қилишида күч ишлитиш арқилиқ ахбарат васитилириға адәттин ташқири дәриҗидә һуҗум қиливатқанлиқини испатлап бәрди.»
