سفارت خانے کی نئی عمارت بنگلہ دیش کے ساتھ ہمارے تعلقات کی اہمیت کا اظہار ہے: ایردوان

ترکی کے صدر رجب طیب ایردوان نےکہا ہے کہ ڈھاکہ میں ترکی کے سفارت خانے کی نئی عمارت اس اہمیت کا اظہار ہے کہ جو ترکی بنگلہ دیش کے ساتھ تعلقات کو دیتا ہے۔

صدر ایردوان نےبنگلہ دیش کے دارالحکومت ڈھاکہ میں ترکی سفارت خانے کی نئی عمارت کی افتتاحی تقریب کے لئے ویڈیو پیغام بھیجا ہے۔

انہوں نے کہا ہے کہ عمارت کے باقاعدہ افتتاح  کے لئے وزیر خارجہ میولود چاوش اولو ڈھاکہ کے دورے پر ہیں اور میں بھی ویڈیو پیغام کے ذریعے تقریب میں شرکت پر نہایت خوشی محسوس کر رہا ہوں۔ یہ خوبصورت عمارت اس اہمیت کا اظہار ہے کہ جو ہم بنگلہ دیش کے ساتھ اپنے تعلقات کو دیتے ہیں۔

انہوں نے کہا ہے کہ روہینگیا مسلمانوں کی صورتحال ایک ایسا موضوع ہے کہ جو بنگلہ دیش کے ساتھ ہمارے تعلقات کے ایک اہم  پہلو  کو تشکیل دیتا ہے۔

صدر ایردوان نے کہا ہے کہ بنگلہ دیش کا، قتل عام  سے بچ کر  میانمار سے نکلنے والے، روہینگیا مسلمانوں کے لئے اپنے دروازے کھولنا ہمارے نزدیک ایک انسانی اور وجدانی روّیہ ہے۔ بنگلہ دیش اورمہاجر  کیمپوں میں مقیم روہینگیا مسلمانوں کے مصائب کے خاتمے کے لئے ہماری انسانی امداد کی کاروائیاں جاری ہیں۔ اس معاملے میں ہم بنگلہ دیش کے ساتھ تعاون کرنا اور تمام پلیٹ فورموں سے اس مسئلے کے منصفانہ حل کے لئےکوششیں کرنا جاری رکھیں گے۔