پاکستان اور ترکی کے مابین مشترکہ بحری مشق "یلدز" کا انعقاد

پاک بحریہ کےترجمان  کی جانب سے جاری کردہ اعلامیے میں کہا گیا ہے کہ پاکستان اور ترکی کی بحری افواج کی سپیشل فورسز کے مابین مشترکہ مشق یلدز کا انعقاد کیا گیا۔

ترجمان پاک بحریہ کے مطابق 12 دن تک جاری رہنے والی یہ مشق مختلف نوعیت کے مشترکہ آپریشنز پر مشتمل تھی ۔

ان کا کہنا تھا کہ مشق کا مقصد عسکری تعلقات اور مشترکہ آپریشنز کی صلاحیت کو فروغ دینا ہے۔

دو طرفہ مشق یلدز کے دوران انسداد دہشت گردی، مغویوں کی بازیابی اور سرچ اینڈ ریسکیو آپریشنز کی مشق کی گئی۔

پاک بحر یہ اور ترک بحریہ کی اسپیشل فورسز کے مابین مشترکہ مشق "یلدز 2019"کا انعقاد کراچی میں کیا گیا۔ "یلدز" سیریز کی یہ مشق پاکستان نیوی اور ترکش نیوی کے مابین ہر سال باقاعدگی سے منعقد کی جاتی ہے۔ اپنی نوعیت کی یہ بارہویں مشق کراچی میں 12 روز تک جاری رہی۔

اس مشق کا مقصد دونوں بحری افواج کے مابین عسکری تعلقات اور اسپیشل فورسزز کے مابین دوطرفہ تعاون اور مشترکہ آپریشنز کی استعداد کے فروغ کے علاوہ پیشہ ورانہ مہارتوں کا تبادلہ تھا۔

اس مشق کے دوران سمندروں میں انسداد دہشتگردی، مغویوں کی بازیابی اور خفیہ معلومات کی بنیاد پر کئے جانے والے آپریشنز کی مشق کی گئی جس سے دونوں بحری افواج کے اہلکاروں نے بھرپور استفادہ کیا۔ یہ مشق پاک بحریہ اور ترکش نیوی کے مابین مضبوط عسکری تعاون کی مظہر ہے۔

پاکستان اور ترکی کے درمیان مضبوط دو طرفہ تعلقات ہیں جن کی بنیاد باہمی اُخوت اور دوستی پر استوار ہے۔ پاکستان اور ترکی کی مسلح افواج کے مابین مختلف فورمز پر باقاعدگی سے تبادلہ خیالات ہوتا رہتا ہے۔

ان دوطرفہ مشقوں سے حاصل ہونے والے پیشہ ورانہ تجربات نہ صرف دونوں بحری افواج کے لئے ہمیشہ فائدہ مند رہے بلکہ باہمی تعاون کو مزید فروغ دینے میں بھی اہم کردار ادا کریں گے۔