" کورونا وائرس" ہلاک شدگان کی تعداد ایک لاکھ پندرہ ہزار سے تجاوز کر گئی

مہلک وائرس کو رونا وائرس سے پھیلنے والی عالمگیر وبا نے دنیا کا پیچھا نہیں چھوڑا، ہلاکتوں کا سلسلہ بدستور جاری ہے، مجموعی اموات 1 لاکھ پندرہ ہزار دو سو چھیاسی تک پہنچ گئیں۔
خبر کے مطابق، دنیا کے 210 ممالک میں کرونا کے متاثرہ افراد کی تعداد 18 لاکھ چونسٹھ ہزار سے تجاوز کر گئی جب کہ وائرس سے 4 لاکھ   تیس  ہزارسے زائد مریض صحت یاب ہو گئے ہیں۔
امریکہ وائرس سے ہلاکتوں اور مریضوںکی تعداد کے لحاظ سے بدستور دنیا کا سر فہرست ملک ہے، جہاں کرونا وائرس سے اب تک 22 ہزار 115 افراد ہلاک ہو چکے ہیں، متاثرہ افراد کی تعداد بھی بڑھ کر 5 لاکھ 60 ہزار سے تجاوز کر گئی۔ ہلاکتوں کی تعداد میں اٹلی دوسرے نمبر ہے جہاں 19899 مریض وائرس سے مر چکے ہیں، جب کہ مریضوں کی مجموعی تعداد بڑھ کر 1 لاکھ 56 ہزار سے زائد ہو گئی ہے۔
اسپین وائرس سے ہلاکتوں کی تعداد کے لحاظ سے تیسرے نمبر پر ہے تاہم  مریضوں کی تعداد کے لحاظ سے اسپین کا نمبر امریکہ کے بعد دوسرا ہے، جہاں ہلاکتیں سترہ ہزار209 ہیں اور 1 لاکھ 66 ہزار سے زائد افراد وائرس سے متاثر ہوئے۔ اموات اور مریضوں کی تعداد کے لحاظ فرانس چوتھے نمبر پر ہے جہاں وائرس 14 ہزار 393 جانیں نگل چکا ہے اور 1 لاکھ 32 ہزار سے زائد متاثر ہیں۔
برطانیہ میں کرونا وائرس سے اموات 10 ہزار 612 ہو گئیں، جب کہ 84 ہزار سے زائد متاثر ہیں۔ ایران میں وائرس سے اموات کی تعداد 4474 ہو گئی، اور 71 ہزار سے زائد متاثر ہیں، بیلجیئم میں 3600 افراد ہلاک ہو چکے ہیں جب کہ 29 ہزار سے زائد متاثر ہیں، چین میں 3341 افراد کرونا وائرس سے ہلاک ہوئے جب کہ 82 ہزار سے زائد متاثر ہوئے، جرمنی میں وائرس 3022 جانیں نگل گیا، جب کہ 1 لاکھ 27 ہزار سے زائد متاثر ہیں،  ہالینڈ میں کورونا 2737 جانیں نگل گیا اور 25 ہزار سے زائد متاثر ہیں۔
برازیل میں کرونا سے 1230 اموات، 22 ہزار سے زائد افراد متاثر ہوئے ہیں،  سوئٹزرلینڈ میں 1106 افراد کرونا وائرس سے ہلاک ہو چکے ہیں اور 25 ہزار سے زائد متاثر ہیں، سوئیڈن میں 899، کینیڈا میں 717، پرتگال میں 504، انڈونیشیا میں 373، آسٹریا میں 350، ایکواڈور میں 333، بھارت میں 331، سعودی عرب میں وائرس سے 59 اموات ہوئیں۔