کورونا وائرس:متاثرین کی تعداد دو لاکھ سے تجاوز کر گئی

چین سے پھیلنے والے  کورونا وائرس سے اب تک دنیا بھر میں 2 لاکھ 22 ہزار افراد کے متاثر ہونے کی تصدیق ہو چکی ہے جبکہ اب تک وائرس سے 9 ہزار 100 افراد جان کی بازی ہار چکے ہیں۔

وائرس کے خوف سے دنیا بھر میں کئی شہروں کو لاک ڈاون بھی کردیا گیا ہے۔

جہاں کورونا وائرس سے بڑی تعداد میں لوگ متاثر ہوئے ہیں وہیں اب تک 84 ہزار 121 افراد صحت یاب بھی ہوچکے ہیں۔

گزشتہ روزدنیا بھر میں سب سے زیادہ تباہ کن صورتحال اسپین میں رہی جہاں ایک دن میں 209 ہلاکتوں کے بعد وہاں وائرس سے مجموعی ہلاکتوں کی تعداد 767 ہو گئی۔ے‎

اسپین میں ملک گیر سرگرمیاں بند ہونے کے باوجود طبی حکام کا کہنا تھا کہ گزشتہ 24 گھنٹوں کے دوران تقریباً ڈھائی ہزار سے زائد نئے کورونا وائرس کے واقعات سامنے آئے جس کے بعدان کی مجموعی تعداد 13 ہزار ہوگئی۔

وائرس سے روس نے بھی پہلی ہلاکت کی تصدیق کردی ہے اور وائرس کی زد میں آ کر ایک 79 سالہ خاتون جان کی بازی ہار گئیں۔

امریکہ کی تمام ریاستوں میں وائرس پھیلنے کے بعد اب 22 ریاستوں میں ہلاک ہونے والوں کی مجموعی تعداد 150 سے تجاوز کر چکی ہے۔

واشنگٹن میں ہلاکتوں کی تعداد 65 تک پہنچ چکی ہے جو ایک ہی روز میں سامنے آنے والی سب سے زیادہ تعداد ہے۔

مجموعی طور پر امریکہ میں کورونا وائرس کے 9 ہزار 415 واقعات سامنے آئے ہیں جبکہ 150 افراد اس وائرس سے ہلاک اور 106 صحت یاب ہوچکے ہیں۔

برطانوی حکومت نوول کورونا وائرس کے پھیلاؤ کو روکنے اور اس کے دارالحکومت میں عوام کی جانب سے تجاویز پر عمل نہ کرنے پر لندن میں جزوی لاک ڈاون کرنے پر غور کر رہی ہے۔

خیال رہے کہ برطانیہ میں اب تک کورونا وائرس کے 2 ہزار 644 کیسز سامنے آچکے ہیں جبکہ 72 افراد ہلاک اور 67 صحت یاب بھی ہوچکے ہیں۔

اٹلی میں گذشہ 24 گھنٹے کے دوران میں کرونا وائرس سے 427 افراد ہلاک ہوگئے ہیں۔اس نئے مہلک وائرس سے اٹلی میں ایک دن میں یہ سب سے زیادہ ہلاکتیں ہیں اور اس یورپی ملک میں اس مہلک مرض سے ہلاکتوں کی تعداد 3405 ہوگئی ہے۔

چین نے گذشتہ سال کے آخر میں وسطی شہر ووہان میں کرونا وائرس کے پھیلنے کے بعد سے 3245 ہلاکتوں کی سرکاری طورپر تصدیق کی ہے۔

اس طرح اب اٹلی میں ہلاکتوں کی تعداد چین سے بڑھ گئی ہے

جہاں دنیا بھر میں کورونا وائرس کے پھیلاؤ کو روکنے کے لیے انتہائی اقدامات کیے جارہے ہیں وہیں جنوبی کوریا میں لاک ڈاؤن کے بغیر کورونا وائرس کے کیسز کی تعداد میں اب نمایاں کمی دیکھی جارہی ہے۔

جنوبی کوریا میں اب تک کورونا وائرس کے سامنے آنے والے مجموعی واقعات کی تعداد 8 ہزار 565 ہے جن میں سے 91 افراد ہلاک اور ایک ہزار 540 صحت یاب ہوچکے ہیں۔

ایران میں گزشتہ روز مزید 149 افراد کورونا وائرس سے لقمہ اجل بن گئے جس سے ایران میں ہلاکتوں کی تعداد ایک ہزار 200 سے تجاوز کر گئی ہے۔

ایران میں اب تک مجموعی طور پر ایک ہزار 284 افراد وائرس سے ہلاک ہو چکے ہیں اور اسے مشرق وسطیٰ میں اسے وائرس کا مرکز قرار دیا گیا ہے۔

ایران میں ایک طرف کیسز کی تعداد میں اضافہ ہو رہا ہے تو وہیں 'نوروز' کے قریب آنے پر مارکیٹوں میں رش اور خاندانوں کے اپنے گھر جانے کے لیے ہائی ویز پر گاڑیوں کی تعداد میں بھی اضافہ ہوا ہے۔

بھارت میں 11 مختلف ریاستوں اور وفاقی اکائیوں سے مزید 27 نئے کورونا وائرس واقعات کی تصدیق کے بعد مجموعی تعداد 169 ہوگئی۔

اسرائیل میں کورونا وائرس کے کیسز میں گزشتہ روز سے اب تک 96 کیسز کا اضافہ ہوا جس کے بعد وہاں مجموعی کیسز کی تعداد 529 ہوگئی۔

اسرائیلی وزارت صحت کا کہنا تھا کہ کیسز کی تعداد میں اضافہ ٹیسٹ کی تعداد میں اضافے کے بعد سامنے آیا اور ملک میں دو روز میں 2 ہزار 200 ٹیسٹ کیے گئے۔

جنوبی افریقہ میں کورونا وائرس کے سبب افراتفری کی صورتحال ہے اور لوگوں نے سپر مارکیٹس میں جوق در جوق آکر سامان خریدنا شروع کردیا ہے جس سے اشیا کی قلت کا خدشہ پیدا ہو گیا ہے۔