وفاقی حکومت کا کراچی کے 1100 ارب روپے کا امدادی پیکیج

وزیراعظم عمران خان  نے کراچی کے لیے 1100 ارب روپے  کے  امدادی پیکیج کا اعلان  کیا ہے۔  

کراچی میں صوبائی حکام کے ہمراہ پریس کانفرس   میں وزیر اعظم نے کہا کہ کسی بھی مسئلے سے نمٹنے کے لیے کوآرڈی لازم وملزوم  ہے، بارشوں سے پہلے کورونا کا چیلنج تھا، کورونا سے نمٹنے کے لیے ہم نے کمیٹی  بنائی۔

انہوں نے  کہا کہ کراچی میں بارشوں تباہ کاریاں ہوئیں ،کراچی کا مسئلہ اہم ہے اس پر بات کرنا ضروری ہے۔ کراچی کے لوگوں نے مشکل وقت کا سامنا کیا، کراچی میں نالے ،نکاسی آب ،بےگھرافراد اور سولڈ ویسٹ  کے مسائل ہیں۔ شہر کی سڑکیں اور دیگر انفراسٹرکچر کا مسئلہ حل کرنا ضروری ہے۔ ہم نے مل کر  کورونا سے نمٹنے کے لیے اقدامات  کیے،  کراچی کے مسائل کے حل کے لیے  بھی مل کر کام کریں گے۔

وزیر اعظم نے بتایا کہ  وفاقی اور صوبائی حکومت نے مل کر 1100 ارب روپے کا پیکیج ترتیب دیا ہے۔ اس کے تحت پینے کے پانی کی فراہمی، نالوں کی صفائی اور بے گھر افراد کی آباد کاری ہوگی۔ کراچی سرکلر ریلوے بھی اسی پیکیج سے پایہ تکمیل کو پہنچائے جائیگا۔