کورونا کے خلاف جنگ سیاسی وابستگی اور تنگ نظری سے بالاتر ہو کرجیتی جا سکتی : صدر عارف علوی

صدر مملکت ڈاکٹر عارف علوی نے کہا ہے کہ کورونا وباءعالمی چیلنج ہے جس پر عالمی ردعمل درکار ہے، پاکستان نے کورونا وباءسے نمٹنے کیلئے متعدد اقدامات کیے ہیں، وزیراعظم کی جانب سے مستحقین کے لیے 8 ارب ڈالر کا ریلیف پیکج دیا گیا ہے، کوروناچیلنج کے خلاف قومی کوششیں بین الاقوامی حمایت کےبغیر پوری طرح موءثر نہیں ہو سکتی ہیں، یہ جنگ سیاسی وابستگی اور تنگ نظری سے بالاتر ہو کرجیتی جا سکتی ہے۔

 ان خیالات کا اظہار انہوں نے غیر وابستہ ممالک کی تحریک کے سربراہ اجلاس سے ویڈیو لنک کے ذریعے خطاب کرتے ہوئے کیا۔ صدر مملکت نے کہا کہ کورونا وباءعالمی چیلنج ہے جس پر عالمی ردعمل درکار ہے، غیر وابستہ تحریک کا سربراہ اجلاس کورونا کے چیلنج سے نمٹنے میں معاون ثابت ہو گا۔

 صدر ڈاکٹر عارف علوی نے کہا کہ پاکستان نے کورونا وبا سے نمٹنے کیلئے متعدد اقدامات کیے ہیں۔ کورونا وائرس کے پھیلاﺅ کے پیش نظر بندشوں کی وجہ سے معاشی طور پر متاثر ہونے والے غریب اور کمزور طبقات کی مدد کے لئے وزیراعظم پاکستان کی جانب سے 8 ارب ڈالر کا ریلیف پیکج دیا گیا ہے۔ انہوں نے کہا کہ پاکستان کے مخیر حضرات بھی اس چیلنج کے خلاف حکومتی کوششوں میں ساتھ دے رہے ہیں۔ صدر مملکت نے مزید کہا کہ کورونا وائرس کے باعث پیدا ہونے والے چیلنج کے خلاف قومی کوششیں بین الاقوامی حمایت کے بغیر پوری طرح موءثر نہیں ہو سکتی ہیں۔ اس وبا ءکا ترقی پذیر ممالک کی معیشت پر گہرا ا ثرا ہوا ہے، اس تناظر میں وزیراعظم عمران خان نے ترقی پذیر ملکوں کیلئے قرضوں کی ادائیگی میں سہولت کی اپیل کی ہے۔

صدر مملکت نے کہا کہ غیر وابستہ ممالک کی تحریک کی ترقی اور امن کے قیام کیلئے کوششیں قابل قدر ہیں، پاکستان غیر وابستہ تحریک کو مزید فعال بنانے کے سلسلے میں کردار ادا کرنے کے لیے پوری طرح تیار ہے۔ صدرمملکت نے مزید کہا کہ بھارت میں کورونا وبا کی آڑ میں مسلمانوں کو نشانہ بنایا جا رہا ہے، بھارت میں مسلمانوں سمیت دیگر اقلیتوں کے خلاف متعصبانہ رویہ جاری ہے جبکہ مقبوضہ کشمیر میں بھارتی مظالم اور ضروری اشیاءکی عدم دستیابی صورتحال کومزید پیچیدہ بنا رہی ہے۔ صدر ڈاکٹر عارف علوی نے کہا کہ کورونا وبا کے خلاف جنگ سیاسی وابستگی اور تنگ نظری سے بالاتر ہو کرجیتی جا سکتی ہے، اس مقصد کے لیے سب کو اپنا کردار ادا کرنا چاہیے