لاہورمیں خودکش دھماکہ، 26 افراد شہید  52 سے زائد زخمی

لاہور میں فیروزپور روڈ پر ارفع کریم ٹاور کے قریب سبزی منڈی کے باہر دھماکا ہوا جس کے نتیجے میں 26 افراد شہید اور 52 سے زائد زخمی ہوگئےہیں ۔

امدادی کارکنوں نے زخمیوں کو فوری طور پر  اسپتال منتقل کردیا جن میں سے 20 کی حالت تشویش ناک بتائی جاتی ہے جس کی وجہ سے ہلاکتوں میں اضافے کا خدشہ ہے۔

جاں بحق ہونے والے پولیس اہلکاروں میں سب انسپکٹر ریاض، اے ایس آئی فیاض، کانسٹیبل علی، معظم، ساجد، عابد اور مرتضی شامل ہیں جب کہ حملے میں اے ایس آئی فیاض کی گاڑی مکمل طور پر تباہ ہوگئی۔ عینی شاہدین کے مطابق پولیس ناکے کے قریب ایک موٹرسائیکل  آکر رکی جس کے بعد زوردار دھماکا ہوگیا  جس کے بعدوہاں کھڑی گاڑیوں اور موٹرسائیکلوں میں آگ لگ گئی۔

موٹرسائیکل لاہور کے رہائشی عثمان علی کے نام پر رجسٹرڈ  ہے  اور اس  کا ماڈل 2017 کا ہے ۔ حکام نے یہ شبہ بھی ظاہر کیا ہے کہ جائے وقوعہ پر کھڑی ہنڈا سوک میں بارودی مواد رکھا گیا تھا جسے دھماکے سے اڑادیا گیا۔

ڈی آئی جی آپریشنز حیدر اشرف نے کہا کہ یہ دھماکا خودکش تھا جس میں پولیس کو نشانہ بنایا گیا، حملے میں 9 اہلکار اور 17 عام شہری شہید ہوئے۔ انہوں نے کہا کہ ترقی کی وجہ سے لاہور ہمیشہ دہشت گردوں کے نشانے پر رہا ہے اور حملوں کا پہلے سے خطرہ تھا، تجاوزات کے خلاف آپریشن کرنے والی ٹیم کی حفاظت پر پولیس تعینات تھی۔

سیکیورٹی اداروں نے جائے وقوعہ کو گھیرے میں لے کر سرچ آپریشن شروع کرتے ہوئے متعدد افراد کو حراست میں لے لیا جب کہ پاک فوج کے دستے بھی جائے وقوعہ پر پہنچ گئے۔ بم ڈسپوزل اسکواڈ اور فارنسک ماہرین نے موقع پر پہنچ کر تحقیقات شروع کردی ہیں۔  حملے میں 8 سے 10 کلو بارودی مواد استعمال کیا گیا۔

وزیراعظم نوازشریف نے دھماکے کی شدید الفاظ میں مذمت کرتے ہوئے قیمتی جانوں کے ضیاع پر دکھ اورافسوس کا اظہار کیا۔ وزیراعظم نے جاں بحق افراد کے لواحقین سے تعزیت کے ساتھ زخمیوں کی جلد صحت یابی کے لئے دعا بھی کی۔