شمالی وزیررستان میں زمینی کاروائی کا آغاز

پاکستانی فوج نے شمالی وزیرستان کے علاقے میران شاہ اور اس کے گردو نواح میں زمینی کارروائی شروع کر دی ہے۔ فوج کے شعبہ تعلقاتِ عامہ (آئی ایس پی آر) کی طرف سے آج پیر 30 جون کو جاری کیے گئے بیان کے مطابق زمینی کارروائی عام آبادی کی طرف سے علاقہ خالی کرنے کے بعد شروع کی گئی ہے۔
آئی ایس پی آر کی طرف سے جاری کردہ بیان کے مطابق فوج کے خصوصی دستے میران شاہ میں گھر گھر تلاشی لے رہے ہیں اور زمینی کارروائی کے نتیجے میں اب تک 15 شدت پسند مارے گئے ہیں، جبکہ دہشت گردوں سے فائرنگ کے تبادلے میں تین فوجی جوان بھی زخمی ہوئے ہیں۔
گھر گھر تلاشی لی جا رہی ہے اور علاقے میں دہشت گردوں کا گھیرا مزید سخت کر دیا گیا۔
آئی ایس پی آر کے مطابق زمینی کارروائی میں اب تک 15 دہشتگرد مارے گئے جبکہ اب تک انیس دہشتگردوں نے خود کو سیکیورٹی فورسز کے حوالے کیا ہے۔ آپریشن ضرب عضب میں سترہ جوانوں نے جام شہادت نوش کیا۔ گزشتہ پندرہ روز میں دہشت گردوں کے اکسٹھ ٹھکانے تباہ ہو چکے ہیں۔ پندرہ جون سے شروع ہونے آپریشن میں ابتک مارے جانے والے دہشتگردوں کی تعداد تین سو چھہتر تک پہنچ چکی ہے۔ آئی ایس پی آر کے مطابق مختلف شہروں میں قائم پاک فوج کے پچپن ریلیف کیمپوں سے دو سو چھہتر ٹن راشن جمع کر کے بنوں بجھوا دیا گیا ہے جبکہ پانچ ہزار چھ سو پینسٹھ مریضوں کو خلیفہ گل نواز ہسپتال بنوں میں طبی امداد دی گئی ہے۔