پاک قومی ٹیم ٹی ٹوئنٹی ورلڈ کپ میں شرکت کے لیے بھارت روانہ

حکومت پاکستان کی اجازت کے بعد قومی کرکٹ ٹیم ورلڈٹی ٹوئنٹی میں شرکت کے لیے براستہ ابو ظہبی بھارت کے لیے روانہ ہوگئی ہے

بھارت اور آئی سی سی کی طرف سے سیکیورٹی کی یقین دہانی کے بعد قومی ٹیم جمعہ کو رات گئے لاہور ایئرپورٹ سے بذریعہ یو اے ای انڈیا کے شہر کولکتہ کیلئے روانہ ہوئی۔

قومی ٹیم کے اسکواڈ میں کپتان شاہد آفریدی، احمد شہزاد، محمد حفیظ، شرجیل خان، سرفراز احمد، عمر اکمل، شعیب ملک، عماد وسیم، خالد لطیف، انور علی، محمد نواز، وہاب ریاض، محمد عرفان، محمد عامر اور محمد سمیع شامل ہیں۔

یاد رہے بھارت میں ہندو انتہا پسند تنظیموں کی جانب سے پاکستانی ٹیم کو دھمکیاں ملنے کے بعد حکومت نے بھارت کی جانب سے سیکیورٹی کی ضمانت نہ ملنے تک ٹیم کو نہ بھیجنے کا فیصلہ کیا تھا جب کہ سیکیورٹی خدشات کے پیش نظر پاکستان اور بھارت کا 19 مارچ کو دھرم شالا میں ہونے والا میچ کولکتہ منتقل کیا گیا۔

بھارت میں تعینات پاکستانی ہائی کمشنر عبدالباسط کی بھارتی سیکریٹری داخلہ سے ملا جس میں بھارت کی جانب سے پاکستانی ٹیم کو فول پروف سیکیورٹی کی یقین دہانی کرائی گئی جس کے بعد وزیرداخلہ چوہدری نثار نے پی سی بی کی ایگزیکٹو کمیٹی کے چیئرمین نجم سیٹھی سے ملاقات میں ٹیم کو بھارت جانے کی اجازت دی۔