ماڈل ایان علی کی درخواست ضمانت مسترد

کسٹم عدالت نے کرنسی اسمگلنگ کیس میں گرفتارماڈل ایان علی کی درخواست ضمانت مسترد کردی ہے ۔
راولپنڈی کے اسپیشل جج کسٹم رانا آفتاب احمد خان کی عدالت میں کرنسی اسمگلنگ کیس میں گرفتار ماڈل ایان علی کی درخواست ضمانت کی سماعت ہوئی ۔ ملزمہ کے وکیل سردار لطیف کھوسہ نے دلائل دیتے ہوئے کہا کہ ایان علی ایک شو کا 5 لاکھ ڈالر معاوضہ لیتی ہیں انہیں معلوم نہیں تھا کہ وہ کتنی رقم باہر لے جا سکتی ہیں۔ جب کہ ایئرپورٹ سے پکڑی گئی رقم ایان علی اور ان کے بھائی ذوالفقار کی مشترکہ ملکیت ہیں اورانہوں نے یہ رقم دبئی میں اپنے بھائی کو دینی تھی۔ اس موقع پر کسٹم کے وکیل فرحت نواز لودھی نے کہا کہ منی لانڈرنگ اسمگلنگ سے بڑا جرم ہے اور کرنسی اسمگلنگ منی لانڈرنگ کا حصہ ہے۔
ایان علی کے وکیل نے موقف اختیار کیا کہ ایئر پورٹس سیکیورٹی فورس کو سونا یا کرنسی چیک کرنے کا اختیار نہیں، وی آئی پی لاؤنج میں بیٹھنا کوئی جرم نہیں، ایک ہزار روپے فیس دے کر کوئی بھی وی آئی پی لاؤنج جا سکتا ہے جہاں سے ایان علی کی گرفتاری ظاہر کی گئی وہاں کسٹم کا کوئی کاؤنٹرہی نہیں جب کہ ایان علی کو ائیرپورٹ پر رقم کی کلیئرنس سے پہلے ہی اسمگلر بنا دیا گیا۔عدالت نے طرفین کے دلائل سننے کے بعد ریمارکس دیئے کہ کرنسی اسمگلنگ کیس میں ملزم کی ضمانت نہیں دی جاسکتی جس کے بعد عدالت نے ماڈل ایان علی کی ضمانت کی درخواست مسترد کردی۔