جس نے ہمارے خلاف ووٹ ڈالا اس کی امداد بند کردوں گا: ٹرمپ کی دھمکی

امریکی صدر ٹرمپ نے دھمکی دیتے ہوئے کہاہے کہ اقوام متحدہ میں جو بھی امریکہ کے خلاف ووٹ دے گا اس کی امداد میں کٹوتی کریں گے ۔
تفصیلات کے مطابق امریکہ کی جانب سے بیت المقدس کو اسرائیلی دارلحکومت تسلیم کرنے کے اعلان کے بعد تمام مسلم ممالک انتہائی غصے میں ہیں جبکہ کئی یورپی اور مغربی ممالک نے بھی امریکہ کے اس اقدام کی مخالفت کی ہے تاہم  آٓج  اس معاملے پراقوام متحدہ کی جنرل اسمبلی کا ہنگامی اجلاس طلب کر لیا گیاہے جس میں امریکہ کے اس فیصلے کے خلاف  قرار داد پیش کی جائے گی اور قرار داد پیش کرنے والوں میں پاکستان بھی شامل ہے ۔
آج ہونے والے اقوام متحدہ کی جنرل اسمبلی کے اجلاس پر امریکی صدر ٹرمپ نے کہاہے کہ ہم تمام صورتحال کا بغور جائزہ لے رہے ہیں اقوام متحدہ میں امریکہ مخالف ووٹ دینے والے ملک کی امداد میں کٹوتی کرینگے  جبکہ ہم نے ایسے تمام ممالک پر نظر رکھی ہوئی ہے جو لاکھوں ڈالرز ہم سے لیتے ہیں اور ہمارے خلاف ہی ووٹ  دیتے ہیں۔

ٹرمپ نے دھمکی دیتے ہوئے کہا کہ وہ ہمارے خلاف ووٹ دیں ہماری بھی بہت بچت ہوگی اور ہمیں پرواہ نہیں۔
واضح رہے کہ سلامتی کونسل کے اجلاس میں بھی مصر کی جانب سے امریکہ کے بیت المقدس کو اسرائیلی دارلحکومت تسلیم کرنے کے خلاف قرار داد جمع کروا گئی تھی جس پر 14اراکین نے اس کے حق میں ووٹ دیا تھا تاہم امریکہ نے اسے ویٹو کر دیا تھا۔