"میلّی اویانیش گونو" و یا بابک قالاسی مراسیمی!
بو توپلانتی‌نین سسی او قَدَر گوجلو ایدی کی، تبریز رادیوسو و حتی تهرانین اطلاعات گونده‌لیگی بو حاقدا خبرلر یایدیلار
آذربایجانین و یا داها دوغروسو ایران تورکلرینین "میلّی اویانیش گونو " و یا "بابکین دوغوم گونو" گلیب چاتیب. بابک قالاسی مراسمی‌نین ایلک دفعه نئجه باشلانماسی ایله ایشیمیز یوخدور؛ بو ساحه‌ده چئشیتلی روایتلر وار؛ آمما بو مراسیم ایلک دفعه ۱۳۷۹ جو هجری گونش ایلی تیر آیی‌نین ۹- ۱۰ و پنجشنبه - جمعه گونلرینده توپلو حالدا و او زامانین یازدیغی نشریه‌لره استناد ائده رک ۹۰ الی ۲۰۰ مین نفر آراسیندا شرکت ائدنلر طرفیندن شرقی آذربایجان اوستانی، اهر شهری و کلئیبر قصبه‌سی‌نین گون باتانیندا یئرله‌شن "بابک قالاسی"ندا باش توتدو .
بو توپلانتی‌نین سسی او قَدَر گوجلو ایدی کی، تبریز رادیوسو و حتی تهرانین اطلاعات گونده‌لیگی بو حاقدا خبرلر یایدیلار. او ایلدن سونرا تیر آیی‌نین ایکینجی پنجشنبه جمعه سی دائمی اولاراق "بابک قالاسی مراسیمی" اعلان اولدو و 1380، 1381، 1382 و 1383 جو ایللره کیمی تیر آیی نین ایکینجی پنجشنبه و جمعه‌سی یوز مینلرله تورک اینسانی بو مراسیمه قاتیلیب و بو ایکی گونده آذربایجانین دیل، تاریخ، ادبیات، فولکلور، موسیقی، داستان و باشقا فرهنگی - هنری ساحه سینده بو گؤزل طبیعت‌ده چئشیتلی و تام مدنی برنامه‌لر اجرا ائدیردیلر کی، 1384-جو ایلدن اونون قاباغی تمامیله آلیندی !
بیرینجی برنامه‌دن، یعنی 1379 جو ایلین "بابک قالاسی" برنامه‌سیندن تقریبا بیر آی سونرا و مرداد آیی‌نین ۱۳-۱۴ گونلری آذربایجان اؤیرنجیلری بیر گردیشی- تفریحی اوردو چرچیوه سینده بابک قالاسینا گئتمه‌یه آد یازدیلار؛ بیزده عائله‌وی شکیلده باشقا دوستلارلا بیرلیکده بو اوردویا قاتیلدیق .
بو اوردونون باشلانیشی 1379 جو ایلین مرداد آیی نین ۱۳ و تبریز اوتوبوس تئرمینالیندان اولاجاقدی؛ تبریز تئرمینالینا کیمی هر کس اؤزو گئتمه‌لی ایدی، بورادان سونرا اوردو مسئوللاری پلان حاضیرلامیشدیلار. بو گونلرین خاطیره‌سیندن یادداشت ائتدیگیم بیر یازی‌دان بیر قیسا بؤلوم بوردا گتیرمک ایسته ییرم :
"دونَن گئجه ( ۱۲ / ۴/ ۱۳۷۹) تهراندان حرکت ائتمیشدیک؛ بو گون صبح ساعات ۸ یاریم حدودو تبریز تئرمینالینا چاتدیق. بیرینجی سالونا طرف گئدرکَن گؤردو ک آقای ق..پ.. و آقای آ...ی ... بیریجی سالونون قاباغیندا دایانیبلار، سلاملاشدیق. بیز سالوندا مستقر اولدوقدان سونرا صبحانه یئمک ایسته ییردیک کی، گؤردوک اونلار صبحانه وسائلینی حاضیرلاییبلار .
گئتدیلر بیر یئکه چایدان قاینانمیش سو آلیب گتیردیلر، بیزده ده قورو چای واریدی؛ دمله‌دیک پنیر- چؤرکده آلدیلار، ائله تئرمینالدا صندل اوستونده صبحانه یئدیک. باشقا شهرلردنده گلیب بیزه قوشولدولار. اورمیه‌د‌ن و نوید آذربایجان نشریه سینده چالیشان ر...ک، ک...ص و باشقا دوستلاردا گلدیلر.
ساعات ۱۲حدودو دؤرد اوتوبوسا مینیب اوّلجه تبریزین ایچینده "مشروطیت ائوی" و "ارک قالاسی"ندان گؤروش ائتدیکدن سونرا بیر گول چلَنگی آلیب "باقیرخان" مزارینا طوبی پارکیندا قویدوق، سونرا یولا دوشوب بابک قالاسینا طرف گلدیک ...... اهر شهرینه چاتدیق، چوخ محروم شهردیر بوشهر! من بیرینجی دفعه‌ایدی اهر شهرینه و بابک قالاسینا گلیردیم. آذربایجان شهرلری فارس شهرلری ایله مقایسه‌ده محرومیتده قالیبلار، آمما اهر شهری آذربایجان شهرلری ایچینده بلکه ان محروملارینداندیر !
بو شهرده شیخ شهاب‌الدین اهری آدلی تانینمیش آذربایجان شخصیتی بیر پارک ایچینده دفن اولوب بو پارکدا اوزون بیر سوفره آچیب ناهار یئییب سونرا دوروب گئتدیک کلئیبره اورداندا بابک قالاسی‍نین آیاغینا و "قالا دره‌سی" آدلانان یئرده کانکس لر و چادیرلاردا یئرلشدیک.
بورا عجب صفالی یئردیر! گؤزل مئشه‌لیک و یانیندان دورو سو ایله کیچیک چای آخیر. بابکین عظمتلی قالاسی داغین دوز کلّه‌سینده گؤرسنیردی اؤزوده چوخ عظمتلی .....!
چادیرلار و کانکس لرده یئرلشدیکدن سونرا فرهنگی برنامه باشلاندی. میکروفون ، بلندگو لار حاضیرلاندی . اورگ، ساز و باشقا موسیقی آلت‌لرده حاضیر اولدو. شعر اوخوندو، ساز چالیندی و آدینی دوکتور آدی ایله سسله‌ین بیر نفر گلیب آذربایجانین مشهور خالق ماهنی لاریندن اوخودو ....
برنامه‌نین داوامیندا " آذربایجانلیلار میلّت یوخسا قوم (قبیله)دیرلار" باره‌ده گؤزل بحثلر اولدو و بلکه گئجه یاری ساعات ایکی اولاردی داها هامی یاتدی ...!
بو برنامه‌لر اجرا اولان زامان بیزیم اوردودان قیراق و اطراف چادیر و کانکس‌لرده اولانلاردا گلیب برنامه یه هوسله قولاق آسیردیلار. بو آداملارین ایچیندن بیری کلئیبر اهالیسی‌نین دیلیندن دئییردی :
" منیم باققال دوکانیمدا عادی گونلرده و معمولی حالدا گونده 5-6 مین تومنلیک جنس ساتیلیر؛ آمما بابکین دوغوم گونلری و تیر آیی‌نین 7 الی 11 جی گونلرینده هر گون ایکی یوز مین تومن حدودو ساتیشیم اولوب! آمما کلئیبر فرمانداری اهالی‌یه دئییب :
"بابکین تولد گونو بورا ییغیشانلارا یئمک - ایچمک امکاناتی یاراتمایین، بابک کافردیر و بو آداملار کافردن تجلیل ائدیرلر، بیزده رئیس جمهورا شکایت یازمیشیق و فرماندارین دگیشیلمه‌سین ایسته‌ییریک ".....!
حسن راشدی: 9/تیر/ 1394
یازی و شکیل‌لر سایین راشیدی‌نین فیس‌بوک صحیفه‌سیندن آلینمیشدیر!
