تورک دؤولتلری تشکیلاتی انرژی ناظیرلری شوراسینین ییغینجاغی ائدیلدی

تورک دؤولتلری تشکیلاتی انرژی ناظیرلری شوراسینین ۴.جو ییغینجاغی، قیرقیزیستانین پایتاختی بیشکئکده تشکیل ائدیلدی.

قیرقیزیستان انرژی ناظیرلیگیندن وئریله‌ن شرحه گؤره، ناظیر تالای‌بک ایبرایئوین ائو صاحیبلیگینده‌کی ییغینجاقدا تورکیه‌نی، انرژی و طبیعی قایناقلار ناظیر کؤمکچیسی احمد برات چونکار تمثیل ائتدی.

ییغینجاغا، آذربایجان انرژی ناظیری پرویز شاهبازوو، قازاقیستان انرژی و طبیعی قایناقلار ناظیر بیرینجی کؤمکچیسی سونگات اسیم‌خانوو، اؤزبکیستان انرژی ناظیر کؤمکچیسی باحتیور مامات‌کاریموو، ماجاریستان خاریجی اقتصادی علاقه‌لر و خاریجی ایشلر ناظیرلیگی مشاویری پتر ایستارای، تورک دؤولتلری تشکیلاتی باش کاتیبی کوبانیچ‌بک عؤمورعلیئوین یانیندا تورکیه، ماجاریستان، آذربایجان و قازاقیستان سفیرلری و موشاهیده‌چی عضو دؤولتلرین نماینده‌لری قاتیلدی.

ییغینجاقدا، تورک دؤولتلری تشکیلاتی عضوو اؤلکه‌لر آراسیندا انرژی ساحه‌سینده امکداشلیغین گوجلندیریلمه‌سی، تکنولوژیلر و یاشیل گیریشیملر اوچون بؤلگه‌سل مرکز یارادیلماسی، انرژی چالیشانلاری آراسیندا ایللیک پئشه باجاریق یاریشمالارینین تشکیل ائدیلمه‌سی، انرژی ناظیرلرینین بیر سونراکی ییغینجاغینین یئرینین تعیین اولونماسی مؤوضوعلاری ماسایا یاتیردیلدی و انرژی ساحه‌سینده‌کی مختلیف مؤوضوع و تکلیفلر قیمتلندیریلدی.

قیرقیزیستان انرژی ناظیری ایبرایئو دانیشماسیندا، ییغینجاغین تورک دونیاسی اؤلکه‌لری آراسیندا انرژی ساحه‌سینده امکداشلیق و تعامولون گوجلندیریلمه‌سی ایستیقامتینده آتیلان بیر آددیم داها اولدوغونو ایفاده ائد‌رک، انرژی بؤلومونون اورتاق اینکیشافینا قاتقیلاری و دستکلری اوچون تشکر ائتدی.

ایبرایئو، تورک دؤولتلرینین انرژی ناظیرلیکلرینین انرژی یوللارینی نؤوعلره آییرما احتیمالینی دقته آلما‌سینی و گله‌جک وعد ائد‌ن انرژی پروژه‌لرینین تطبیق اولونماسیندا آکتیو رول آلماسینی تکلیف ائتدی.

ایشتیراکچیلار دا بؤلگه‌سل بیر تکنولوژی و یاشیل گیریشیملر مرکزینین قورولماسینی اله آلماغا حاضر اولدوقلارینی دیله گتیردی.

طرفلر، اؤلکه‌لر آراسیندا الکتریک تداروکو و دییشیمی ساحه‌سینده امکداشلیغی داوام ائتدیرمه‌یه حاضر اولدوقلارینی قئید ائتدی.

ییغینجاق، نتیجه بیلدیرگه‌سینین ایمضالانماسییلا سونا چاتدی.